El Tartiere coló con un amargosu sabor de boca. Una derrota nun momentu clave de la temporada, buscando l'equipu l'empate anque a remolque, tres una mala primer parte.
Primer partíu de sanción de Javi Rozada, con Benavides nel banquín, y solo dos cambeos nel once titular col regresu de Juanjo Nieto y Carlos Hernández, en cumpliendo sanción, y de regresu na defensa. El primer avisu protagonizólu el Real Oviedo, con un remate de Ibra qu'unvió alto, tres pase de Saúl. Respondió'l Alcorcón, cola primer llegada y el gol. Nuna xugada per banda, que terminó convirtiendo nel cero a unu Stoichkov.
Costó-y reaccionar al conxuntu oviedista, que se vió superáu nel xuegu anque nun concediendo demasiaes ocasiones, pero ensin xenerar acercamientos con peligru a la meta rival. Terminó peor la primer metá, con un penalty decretáu tres revisión de VAR, nel que se consideraba pena máxima una acción qu'en primer instancia paecía fora de xuegu. Convirtió dende los once metros de nuevu Stoichkov y llegó el descansu.
Reaccionó'l Real Oviedo na segunda metá, con mayor posesión y numberoses llegaes. Entraron dende'l banquín Borja Sánchez y Ortuño, y foi esti postreru quien convirtió otru penalty, nesti casu a favor, decretáu por mano na área tres revisión de VAR. El Tartiere emburrió al so equipu en busca del empate. Tuvieron ocasiones los azules, de botes de Saúl, de Ibra, de Rodrigo inclusive de Luismi, pero en toes apaeció Dani Jiménez so palos evitando'l gol.
Una derrota que ruempe la racha del equipu ensin conocer la derrota, antes de visitar al CD Lugo na próxima xornada.
