La tercer xornada de LaLiga SmartBank dexónos nel últimu sábadu del mes d'agostu un Real Oviedo- CD Tenerife nel Carlos Tartiere, onde 6.381 espectadores dieron cita para ver una nueva cita del so equipu nel estadiu oviedista, con repartida de puntos a la fin de los 90 minutos.
Optó Ziganda por dar continuidá al once qu'allinió la pasada fin de selmana en Los Juegos Mediterráneos, col estrenu en convocatoria de Carlos Isaac y Luismi, col debú na 21/22 del mediocampista andaluz. D'esta forma, l'equipu escoyíu pol navarru para'l choque ente'l conxuntu tinerfeñu foi'l formáu por Femenías; Lucas, David Costas, Dani Calvo, Pierre; Sangalli, Jimmy, Javi Mier; Viti, Borja Sánchez y Obeng, que saltaron al verde del feudu oviedista en busca de la victoria.
La primer metá empezó con un Real Oviedo que se fixo dueñu del balón, buscando transiciones rápides p'aprovechar la verticalidá de los homes de banda y crear peligru con centros a la área. Viti avisó a los pocos minutos de xuegu, con un balón que'l porteru visitante unvió a córner. Los azules, bien aplicáu en defensa, aprovechaben los robos en campu propiu pa buscar a Samuel Obeng y empezar les contras. La ocasión más clara del primer actu llegó nuna bona xugada per banda, ente Pierre y Borja Sánchez, qu'esti punxo na área pa que Obeng rematara sobro la meta de Soriano. Atayó la meta canariu, dexando'l balón muertu na área con una sucesión de remates posteriores de Sangalli y el mesmu delanteru ghanés. Nun dexó d'intentalo'l conxuntu de la capital del Principáu, anque'l Tenerife ganó cierta presencia en campu oviedista, ensin apenes xenerar peligru sobro la meta de Femenías. Nos postreros compases del primer tiempu ambos equipos partieron la posesión, con muncho xuegu nel centru del campu y con un Real Oviedo que primía la llínea de salida de balón visitante. Borja, nuna bona acción individual, y Viti, aprovechando la presión, tuvieron les dos acciones de peligru que cerraron la primer parte.
Tres el pasu por vestuarios l'empiezu foi similar, coles primeres ocasiones del llau oviedista, que llevó'l pesu del partíu nos compases iniciales del segundu actu. Les bandes volvieron cobrar un importante protagonismu, dando amplitú y movilidá al xuegu oviedista. Siguía'l control oviedista, con bonos minutos de los de Ziganda, que teníen nes asociaciones de Pierre y Borja Sánchez una fonte de peligru pa xenerar ocasiones sobro l'arcu defendíu por Soriano. El técnicu oviedista movió'l banquín pa dar entrada a Jirka, y darréu a Borja Bastón y Luismi. Matheus Aiás foi l'últimu cambéu d'un alcuentru qu'acabó col Real Oviedo buscando desfaer el marcador inicial, anque ensin aciertu pa llogralo.
Nuevu puntu nel casillero oviedista, que sabe a poco dada la superioridá y les ocasiones xeneraes polos de Ziganda, que la próxima xornada van viaxar a El Alcoraz pa midise a la SD Huesca.
