Xornada intersemanal pal Real Oviedo, cola visita del Burgos al Carlos Tartiere, nun partíu que concluyó cola resultancia de 1-3 a la fin del tiempu reglamentariu.
Con tres novedaes nel once respecto al postreru partíu nel Reale Arena saltaron los azules sobro'l verde del estadiu oviedista, con un equipu formáu por Femenías; Lucas, David Costas, Dani Calvo, Pierre; Jirka, Jimmy, Brugman, Borja Sánchez; Joni Montiel y Borja Bastón, nun choque nel que los azules nun tuvieron la nueche, y anque igualaron la guerra na segunda metá, el Burgos remató nos minutos finales.
La primer parte foi trabada, con muncho xuegu interior, y con un Real Oviedo al que-y costó crear peligru sobro la meta d'Alfonso Herrero. El Burgos cutió primero con tantu de Guillermo, ente'l cual el conxuntu de la capital del Principáu trato de responder, ensin suerte.
Tres el pasu por vestuarios, el conxuntu de la capital del Principáu comenzo a proponer más qu'el so rival, con asociaciones pa dir superando les llínees del Burgos. Frutu d'estes combinaciones empezaron a llegar les ocasiones de peligru, Borja Sánchez, con un disparu al travesañu, tres una bona xugada de Jirka, avisó a Alfonso Herrero. Sería Borja Bastón dende los once metros, tres revisión del VAR por valtamientu de Jirka na área, el que pondría l'empate nel lluminosu. Col 1-1 nel marcador, Ziganda movió'l banquín y dio entrada a Matheus y Pombo. El gol dio-y aire y ritmu al Real Oviedo, que nun cesó nel so intentu de buscar el segundu, anque'l Burgos volvió responder con otru tantu de Guillermo. Los azules tuvieron dos llargueros pa poner les tables. Obeng foi l'últimu cambéu de los de la capital del Principáu, primero que los visitantes punxeren el terceru nel marcador.
Derrota azul nel Carlos Tartiere del conxuntu de la capital, que la próxima fin de selmana va viaxar a El Toralín pa vese les cares cola Ponferradina.
