El Real Uviéu nun foi quién a romper el so maleficiu particular col campu de Santo Domingo, anque fixo méritos pa llogralo.
Con dos cambeos nel once al respective del del domingu pasáu, la entrada d’Alanís y de Tejera por Mossa y Boateng, el Real Uviéu salió enchufáu dende los primeros compases del partíu. Con centros dende la banda, o en xugada a balón paráu, el conxuntu uviedista averóse nel arranque del partíu a la meta de Dani Jiménez. La más clara foi de Joselu, nuna contra, y cruciando el so disparu ente trés defenses y el meta local, pero marchó raspiando’l segundu palu. Llegó entós la lesión d’Alanís, que pidió’l cambéu nel minutu 16 de partíu. Mossa ocupaba’l llateral y Christian movía la posición al centru de la defensa. Alfonso intervenía entós p’atrapar un mano a mano énte Juan Muñoz, y llegaba’l gol del Alcorcón nun disparu potente de Dorca, que firmaba l’un a cero. Costó-y reaccionar al Real Uviéu hasta’l descansu.
Na segunda volvía salir meyor el conxuntu uviedista, y d’él yeren trés ocasiones clares nos primeros compases depués de la continuación. Un llanzamientu directu de falta, botada por Saúl Berjón, buscaba la escuadra, pero Dani Jiménez esvió a córner. Christian Fernández remataba esi saque d’esquina, pero volvía atopase col meta local. De siguío probaba suerte Saúl Berjón, en carrera, rematando esviao. Y llegaba’l segundu de los locales. Depués d’una falta mui discutida pol equipu d’Anquela, Juan Muñoz anotaba pela escuadra en llanzamientu directu’l segundu pal Alcorcón. Entraron Aarón y Ibra nel Real Uviéu, y el conxuntu uviedista nun aparó nel intentu de menguar distancies. Joselu anotaba’l dos a un, pero anuláben-ylu y decretaben saque de puerta cuando’l balón nun trespasare la raya de fondu. Asina se llegó a la fin del partíu y el Real Uviéu volvió de vacío a Asturies.
El próximu entrenamientu va ser el martes, a les 18:00 hores, n’El Requexón.
