Cruel derrota nel estrenu n’El Carlos Tartiere en Primera

Ganes de tornar al Carlos Tartiere. Con esi pensamientu llegaba’l Real Oviedo a la segunda xornada de LaLiga EA Sports. Los carbayones encaraben al Real Madrid nel primer partíu de la temporada en casa, con un conxuntu azul que quería llograr los tres primeros puntos d’esti arranque llixeru. Tres la derrota n’El Estadi de La Cerámica, Veljko Paunović sacó d’entamu a Aarón Escandell, Oier Luengo, David Costas, Dani Calvo, Rahim, Sibo, Nacho Vidal, Ilic, Dendocker, Chaira y Rondón.

 

Salió rápido l’Oviedo con Ilyas Chaira, que s’escurrió pela defensa blanca, pero Courtois sacó’l balón. La réplica foi de Rodrygo: el brasileñu entró nel área y tiró con rosca al palu llargu, obligando a Aarón a estirase. Cuatro minutos dempués, Dani Calvo evitó’l primeru de los de Xabi Alonso, anticipándose a Mbappé cuando yá se preparaba pa fusilar.

 

Pasáu’l cuartu d’hora, Costas tuvo qu’intervenir pa mandar a córner un intentu de Rodrygo. Nel 22´, los de Paunović tuvieron la más clara del primer tiempu: Rondón, tres una bona xugada individual, dio-y el balón a Dendocker, que intentó una vaselina. Courtois atrapó ensin problemas.

 

La igualdá siguía nel marcador, pero los blancos dispusieron d’una doble ocasión: Aarón paró un disparu con zurda de Rodrygo y dempués la defensa azul sacó’l rechace d’Arda Güler. Pocos minutos dempués llegó’l primer gol nel Tartiere. Tchouameni robó nel mediu campu y filtró pa Mbappé, que batió a Aarón con un tiru cruzáu: 0-1.

 

Tres el descansu, Paunović metió a Hassan por Oier Luengo. El Madrid tuvo la primer del segundu actu per Valverde, con un disparu de lloñe que salió desviáu. Poco más tarde, Sibo probó suerte dende la frontal, pero Courtois paró ensin dificultaes.

 

Con minutos tamién pa Fede Viñas y Ejaria, Hassan intentó sorprender con un tiru llargu, pero foi por riba. Brekalo salió por Chaira pa facer el so estrenu en Primera. El croata tuvo’l empate col 6’ azul, pero’l so disparu topóse col palu izquierdu de Courtois nel 81.

 

Del posible 1-1 pasóse al 0-2: Vinicius robó en campu azul y asistió a Mbappé, que fixo’l so doblete con un golpeo ajustáu. Dos minutos más tarde, Aarón evitó’l hat-trick del francés con una gran parada.

 

Hassan buscó recortar distancies con un zurdazu cruzáu, pero atayó Courtois. Viñas intentó’l rechace con una chilena desviada. Ente l’aplausu del Tartiere, entró Cazorla, recibíu como la lleenda que ye. Yá nel tiempu añedíu, Vinicius marcó’l terceru y definitivu 0-3 nun contrataque.

 

Agora, toca pensar na Real Sociedad, que va visitar El Carlos Tartiere’l próximu sábadu 30 d’agostu.