El Carlos Tartiere entornose col so equipu. Y el equipu de Javi Rozada-y dió motivos para creer, casi hasta'l final. L'afición oviedista respondió, n'una tarde fundamental para los azules que nun queríen dexar pasar un día más ensin llograr la primer victoria de la temporada.
Un par de retoques nel once, y pareya en punta de Joselu y Ortuño, punxeron llueu'l partíu de cara para los de Javi Rozada. Al minutu dos xuna asistencia de Saúl, que Joselu dexó pasar pa que rematara el máximu goliador del equipu, terminaba nel primer gol del partíu. Ortuño sumaba'l sestu a la so cuenta de pichichi de la categoría, el primeru de la tarde, y ponía al Tartiere de pies. El guión desarrollábase según el plan inicial de los oviedistas. Ordenaos en defensa, ensin conceder ocasiones clares para los maños, con Nereo Champagne apaeciendo en dos xugaes d'acercamientu del Zaragoza, y con recuperaciones rápides de balón, la siguiente ocasión clara foi de Joselu, nun remate de cabeza a balón colgáu de Saúl qu'estenaba a córner la zaga del Zaragoza. Túvola Sangalli nun remate que se coló fora, y de nuevu Joselu, a pase de Saúl, que remató delantre del meta del Zaragoza, estenando a saque d'esquina. Un erru en defensa foi decretáu penalty. Y tresformaba el Zaragoza poniendo l'empate nel marcador, obra de Luis Suárez dende los once metros.
Tres el descansu, llegaba'l penalty para los oviedistas por un derribu de Ortuño na área decretáu pol colexáu tres revisión nel VAR. Convertía de nuevu'l delanteru oviedista y ponía el dos a unu nel marcador. Diez minutos más tarde de nuevu Luis Suárez empataba para'l Real Zaragoza. A partir d'entós intentábalo el Real Oviedo con más corazón qu'atino. Movió banquín Rozada dando entrada a Lolo, Borja Sánchez y Yoel Bárcenas, y anque con acercamientos y entornaos n'ataque, nun atoparon el gol.
El Tartiere despidió a los suyos con aplausos, para encarar una nueva selmana con doble compromisu. El siguiente'l miércoles nel Heliodoro Rodríguez López, en Tenerife.
AST
