El Real Ovedo precisaba ganar. Tres puntos para siguir con vida, y na engarradiella para lluchar por sobrevivir. Dempués d'una selmana dura, tres la derrota en Lugo, l'afición nun-y falló al so equipu y respondió percima del sobresaliente. Ambiente de luxu nel Tartiere para llevar al so equipu a una engarrada, sufierta y agónica victoria en cantu del tiempu reglamentariu.
Dos cambeos obligaos poles sanciones en defensa, entrada d'Arribas y Mossa, y vuelta de Sangalli a la titularidá de la banda derecha. Ziganda estrenóse nel banquín del Tartiere, y fízolo n'una primer metá na que salió más enchufado el Real Oviedo, pero que col pasu de los minutos empezó a complicase. A pesar de que'l Tenerife nun esmolió con claridá en nengúnmomentu la meta de Lunin, y que'l conxuntu oviedista concedió pocu'l
defensa, faltaba posesión y llegada. Un chut de Saúl, un remate de cabeza de Ortuño en llanzamientu de falta, y un tiru directu de Tejera en balón paráu fueron les más clares de la primer metá.
Na segunda metió una marcha más l'equipu de Ziganda, y tamién el Tartiere dende la grada. L'afición animó ensin fuelgu mientres los segundos cuarenta y cinco minutos, y l'equipu tuvo más cómodu nel terrén de xuegu. Más posesión, más combinación, ensin pasar apuros en defensa y colos cambeos, más peligru n'ataque. Salieron Borja Sánchez ya Ibra para quemar tola artillería ofensivo, y anque hubo qu'aportunar, finalmente llegó'l premiu. Nel 85, una xugada na área del Tenerife yera revisada pol VAR y terminaba en penalty. Fusilaba dende los once metro Rodrigo nel 88, poniendo l'unu a cero nel marcador, y defendiendo con uñes y dientes los siete minutos d'agregu una victoria que se cuayó ente'l verde y l'afición. Trés puntos que dexen coyer aire y siguir trabayando nel próximu partíu na llucha pola permanencia, la próxima fin de selmana en Extremadura.
