L’entrenador del Real Uviéu compareció esta mañana en sala de prensa depués del entrenamientu del equipu n’El Requexón. Tres de la selmana de trabayu, Anquela comentaba que "el partíu del domingu yá pasó, y l’ánimu tien que tar bien. Tuviemos un poco murnios, pero dientro de la normalidá, y yá pensando nel que vien. Quedamos coles coses bones, rescampla que cometimos munchos equivocos y que’l rival castigónos. Esos equivocos nun se dieron hasta’l domingu, el día que más precisábemos tar bien, fallemos en momentos puntuales. Hai que tar tranquilos, saber lo que se quier, y tener una cosa clara: el futbolista tien que tar preparáu pa lo que ye esta categoría, y esta categoría ye de sufrir. El que nun sepa encaxar los golpes que te da’l fútbol, llévalo mal. Nel Real Uviéu tenemos que nos avezar a que vamos sufrir, hasta l’últimu minutu, y ye daqué qu’hai que tener claro".
Amás, el técnicu xienense reconocía que "el domingu pasáu viví una esperiencia maraviyosa. Perdiemos pero fui pa casa diciendo: madre mía, cómo apierten... Y eso ye guapo y nun hai que perdelo enxamás. El futbolista tien que se dar cuenta de que tamos nun equipu que ye asina y equí’l que nun cuerra vénse-y munches coses y vénse-y rápido. Corriemos más porque nos apertaron dende arriba. Paezme que tamos preparaos pa facelo, somos un bon equipu de fútbol qu’empezó con problemes, pero hai que tar preparaos pa too, saber sufrir y, cuando vengan momentos malos, axuntanos".
Sobre’l planteamientu lloñe del Carlos Tartiere esti sábadu n’Almería, l’entrenador del Real Uviéu aseguraba que "intentamos afacenos a lo qu’hai y saber interpretalo bien. Voi facer lo que crea que nos da más posibilidaes de facer un bon partíu".
En casos específicos y entrugáu por Mariga, el técnicu foi claru señalando que "con Mariga hai que tener paciencia porque lleva meses ensin xugar y nun voi echalu a los lleones el primer día, hai que tener tranquilidá. Esto ye mui llargo, paez que si nun xueguen el primer partíu ye una hecatombe. Anda que nun da vueltes esto, y vamos xugar y participar toos, y sobre manera qu’ellos col so rindimientu me pidan xugar. Hai que dir adulces y faciendo les coses cola paciencia necesaria".
En cuantes al rival d’esta fin de selmana, Anquela yera claru sobre la UD Almería: "Tienen un bon equipu, fixo una plantiya perequilibrada. Esti día vi’l partíu, un partíu de Segunda División, el que la metió ganó. Esa ye la secuencia de cada selmana y cada domingu. Equí ye imposible saber quién va tar arriba. Vuelvo repetir que’l que nun sepa lo que ye esta categoría, y los terrenos que tría, llévalo mal. L’equipu lleva dos temporaes que-y falta un emburrionín y a ver si anguaño tenemos la suerte de dar esi pasu más y competir como la xente quier", sentenció.
