L'entrenador del Real Oviedo, Guillermo Almada, compareció en rueda de prensa tres l'empat llográu ante'l Deportivo Alavés, un partíu que dexó sensaciones positives nel xuegu pero tamién frustración por nun haber podido traduciles nel marcador.
El técnicu azul reconoció la tristura del vestiariu pol resultáu: “Tamos tristes porque queríemos y merecimos ganar. Fiximos ocasiones bien clares y nun les concretamos. Insistimos nos nuestros pecaos y fallamos na finalización, y eso fai que perdamos puntos”. Nesa llinia, subrayó que l'equipu amosó una clara evolución nos últimos alcuentros: “Merecimos ganar los dos últimos partíos, pero nun concretar los goles penalízanos”.
A pesar del empatéu, Almada valoró mui positivamente la imaxe ufiertada pol equipu en Mendizorroza: “Esti ye'l camín. La idea encaxó bien nos xugadores. Duele nun haber ganao güei porque la imaxe foi convincente nun campu complicáu. Hai que quedar col positivu y complementar esta evolución cola efectividá”.
L'entrenador tamién destacó l'actitú del grupu, tanto nel trabayu diariu como na competición: “La disposición de los futbolistes ta siendo perfecta nos entrenamientos y nos partíos. Pa salir d'esta situación necesitamos de la nuestra xente y pa llograr eso tenemos que xugar como güei”.
Sobre la falta de gol, Almada esplicó que'l momentu actual pue tar influyendo na toma de decisiones: “El gol ye l'alegría más grande pa un futbolista y quiciabes vénsenos ansiosos al definir. Hai que sobreponese a eso porque los partíos gánense con goles. Ellos fixeron un golazu de tiru llibre y pa mí l'empat ye inxustu”.
Almada tamién faló sobre l'estáu físicu d'algúnos xugadores. Respectu a Borbas, señaló que la so puesta a puntu requiere paciencia: “La forma deportiva piérdese rápido y gánase lentamente. Ye mozu y tien salú, veremos el día a día”. Sobre'l debú de Fonseca, amosóse satisfechu: “Entró bien al partíu y seguro que mos va dar muncho nesti campeonatu”.