El Real Uviéu y Diegui Johannesson llegaron a un alcuerdu pa l’ampliación del so contratu.
D’esta forma, el maliayés, que tenía contratu en vigor hasta’l 30 de xunu del 2018, allarga la so vinculación cola entidá un añu más, hasta’l 30 de xunu del 2019.
Diegui Johannesson, qu’encara la cuarta temporada formando parte del primer equipu del Real Uviéu, llegó a la entidá carbayona na campaña 2010/11 pa formar parte del xuvenil uviedista. L’asturianu diba pasar depués peles files del Real Uviéu Vetusta, alternando la so última campaña nel filial col primer equipu. Amás, na temporada de la so estrena en Segunda División, Diegui Johannesson debutó cola Selección Islandesa frente a Estaos Uníos el 31 de xineru del 2016.
El llateral uviedista va empezar la pretemporada el día 10 de xunetu baxo les órdenes de Juan Antonio Anquela pa tar a disposición dafechu del técnicu de la qu’empiece la temporada.
