Esta tarde foi la firma del alcuerdu ente’l Real Uviéu y FUNDOMA, con presencia del presidente de la entidá, Jorge Menéndez Vallina, y la directora xeneral de Minería y Enerxía y presidenta del Patronatu de la Fundación Docente de Mineros Asturianos (FUNDOMA), Belarmina Díaz Aguado. El conveniu soscritu va dexar usar les instalaciones deportives y la residencia universitaria Clavería, propiedaes del FUNDOMA, a la nuestra entidá.
Cola firma d’esti documentu, establezse l’arrendamientu d’instalaciones deportives (polideportivu y campu de fútbol 7 de yerba artificial) pal desenvolvimientu de l’actividá deportiva polos equipos de la Escuela del Real Uviéu, llanzada va poco, y que va establecer la sede neses instalaciones. Amás, l’alcuerdu dexa usar les instalaciones de la Residencia de FUNDOMA “Clavería”, que va cuntar con 45 places y va ser esclusiva pal agospedamientu de canteranos de la entidá.
L’alcuerdu, a futuru, y con aspiraciones al plazu llargu, tien una duración inicial d’un añu cola mira de qu’empiece la collaboración ente dambes entidaes y de cara a convenios futuros ente dambes instituciones.
Tanto la directora xeneral de Minería del Principáu como’l presidente del Real Uviéu destacaron la relevancia del alcuerdu, que dexa dotar d’usos nuevos dalgunes de les instalaciones de la institución y, amás, agospedar a futbolistes mozos. El sitiu tien les condiciones necesaries pa la medría del club y pal desenvolvimientu d’actividaes tanto d’área social como de formación. Llueu van dir ampliándose les actividaes a llevar a cabu nunes instalaciones que presenten munches posibilidaes pal Real Uviéu.
El FUNDOMA ye l’orfanatu mineru d’antaño, creáu en 1929 col fin d’agospedar y dar educación a güérfanos y güérfanes de los mineros, atender les sos necesidaes físiques, morales y intelectuales y de sofitar la so integración social. Na actualidá, ta diversificando l’actividá, polo qu’aprovecha les sos instalaciones allugaes na falda del Monte Naranco, n’Uviéu, pa definir un proyectu de cambéu en coherencia col calter social y de formación de la entidá.
