El Real Oviedo nun pudo sumar ante’l Rayo Vallecano y cayó derrotáu por 3-0 nel Estadiu de Vallecas, nel alcuentru aplazáu que suponía una auténtica final pa los azules na so llucha pola permanencia. El conxuntu carbayón viose superáu dende l’entamu por un rival que dominó’l xuegu y castigó con eficacia pa dexar mui tocáu al equipu de Guillermo Almada.

 

Dende’l pitíu inicial, el Rayo impunxo’l so ritmu. Con una posesión práuticamente total mientres la primer metá, los madrilanos monopolizaron el balón y sometieron al Oviedo. Los llocales xeneraron les ocasiones más clares, ente que’l conxuntu azul apenes pudo estirase n’aiciones aisllaes que nun llegaron a inquietar la portería defendida por Augusto Batalla.

 

L’Oviedo resistía como podía, con trabayu defensivu y solidaridá, pero ensin capacidá pa enllazar posesiones llargues nin pisar área contraria con peligru. Cuando paecía que’l descansu llegaría col empate inicial, el Rayo atopó premiu. Un disparu dende la frontal foi refugáu por Aarón Escandell, pero’l rechace cayó nos pies de Jorge de Frutos, que nun perdonó y adelantó a los llocales al filu del intermediu.

 

Tres el pasu polos vestuarios, Almada buscó camudar el rumbu del partíu con un doble cambéu. Santi Cazorla y Thiago Fernández entraron al terrén de xuegu en sustitución de Sibo ya Ilyas Chaira, cola intención de ganar presencia en campu rival y dotar al equipu de mayor claridá col balón.

 

Sicasí, el golpe definitivu llegó demasiao llueu. Lucas cometió penalti y, de nuevu, Jorge de Frutos asumió la responsabilidá dende los once metros pa firmar el segundu tantu de la tarde. El gol dexó mui tocáu a un Oviedo que nun llograba rehacese y que, superada la hora de xuegu, encaxó’l terceru. Álvaro aprovechó una aición dientro del área y, tres un primer intentu repelíu por Escandell, batió al guardameta azul nel segundu remate pa zarrar el marcador.

L’Oviedo echó’l restu en busca d’un tantu que lu metiera nel alcuentru, pero nun hubo manera.

 Esta derrota dexa a los ovetenses nuna situación comprometida nel so oxetivu d’abandonar los puestos de descensu y fai que la permanencia siga a nueve puntos.

Próximu alcuentru: de nuevu a domiciu ante’l RCD Espanyol.