El técnicu del Real Oviedo, Guillermo Almada, compareció ante los medios de comunicación tres la derrota encaxada esti miércoles frente al Rayo Vallecano (3-0). N'una sala de prensa marcada pola autocrítica y el tonu reflexivu, l'entrenador azul asumió responsabilidaes y apeló a la reacción inmediata del equipu.

El míster nun escondió la dureza del golpe, reconociendo que foi l'alcuentru más floxu dende la so llegada al banquillu carbayón. “Nun doi nada por perdíu, anque fiximos el peor partíu dende que tamos nós. Vi al equipu agotáu del otru día. Intentamos recuperanos, pero nun se mos vio cola chispa necesaria. Xugamos mal y nun merecimos otru resultáu que esti”, esplicó.

Al so xuiciu, el desgastu acumuláu acabó siendo determinante nel desenvolvimientu del partíu. “A vegaes el fútbol ye un camín espinosu y duru. Agora tenemos que tratar de llevantanos. Hai que recuperar a los futbolistes y tomar les meyores decisiones”, amestó.

El técnicu tamién se refirió al estáu anímicu del vestiariu tres el pitíu final. “Los xugadores tán tocaos. Acabamos con Borbas lesionáu cuando yá habíemos agotáu los cambios. El resultáu ye dolorosu pero somos homes grandes y hai que llevantase pal llunes".

Nel so análisis, insistió na falta de frescura como ún de los factores clave. “Nun tuvimos cola chispa que xeneralmente tenemos. Vi a munchos xugadores cansaos y eso nel fútbol ye determinante. Vamos facer un análisis bien fondón d'esta situación y esperemos que nun se repita más, anque tenemos poco tiempu hasta'l partíu del Espanyol”.

Por último, l'entrenador uruguayanu reconoció nuevamente que'l equipu acusó especialmente l'esfuerciu realizáu díes atrás ante l'Atlético. “Pudimos facer cinco cambios, pero si pudiéramos facer once lo habríemos fechu. Faltónos rebeldía tamién. Namás podemos buscar les meyores alternatives dientro de lo que tenemos. Si hai un culpable d'esta derrota soi yo. Hai que sacar fuercia de flaquera y afrontar lo del llunes”