El Real Oviedo tornaba esta nueche al Carlos Tartiere para encarar el partíu correspondiente a la xornada 29 de la LaLiga Smartbank énte l'Albacete Balompié. Los d'Álvaro Cervera formaben d'entamu con: Braat, Lucas, Rodri Tarín, Dani Calvo, Abel Bretones, Montoro, Jimmy, Mangel, Viti, Sergi Enrich y Manu Vallejo.
Coles mires de llevar la iniciativa y tratar d'enllantar el so estilu de xuegu. Asina salió'l conxuntu uvieín al partíu. Dempués de que los primeros minutos trescurrieren con igualdá ente dambos conxuntos, Enrich, nel minutu 25, dispondría d'una bona acción de peligru. El balear remató un gran centru d'Abel Bretones dende'l perfil esquierdu pero'l so testerazu salió centráu y el porteru rival atrapó ensin entueyos.
El Real Oviedo buscaba insistentemente la meta rival y tan solo cinco minutos llograría'l premiu del gol. Jimmy, nel 29´, batía a Bernabé con un gran disparu dende la frontera de la área y anotaba un golazu pa poner a los uvieinos per delantre nel marcador. El carbayones facíen xusticia a vistir sobro'l terrén de xuegu y colábense al descansu con ventaya sobro'l conxuntu manchegu.
Tres la continuación, Braat evitó l'empate con una magnífica parada de reflexos tres una bona xugada colectiva del Albacete. Cuando l'alcuentru llegaba al minutu 50, l'árbitru señaló penalti a favor del Real Oviedo por un agarrón sobre Tarín dientro de la área pero finalmente'l VAR correxía la decisión y dexaba a los azules ensin la pena máxima. Tres esa acción, l'equipu visitante igualó'l choque gracies al tantu d'Álvaro R.
Col 1-1, Álvaro Cervera dio entrada al terrén de xuegu a Sequeira, Masca, y darréu a Hugo Rama y a Borja Sánchez, pa tratar de buscar la victoria. Abel
Bretones, por esquierda, y Lucas, dende'l perfil derechu, buscaron al traviés de los sos centros el remate de dalgún de los delanteros pero nengunu de los remates llogró ver puerta. Na última acción de peligru del alcuentru, Hugo Rama botó una falta dende la derecha con muncho peligru pero'l remate de Tarín colóse esviáu. Tres esa ocasión, el colexáu señaló'l final del alcuentru que terminó con repartida de puntos nel Carlos Tartiere ente Real Oviedo y Albacete Balompié.