El Real Oviedo encaraba esti sábadu una nueva xornada del campeonatu lligueru coles mires de tornar a la sienda de la victoria y alloñar de los

puestos de baxo. Los azules viaxaben nesta ocasión hasta Leganés para encariar el partíu correspondiente a la xornada 32 de la LaLiga Smartbank énte'l CD Leganés. Los d'Álvaro Cervera formaben d'entamu con: Braat, Lucas, David Costas, Dani Calvo, Abel Bretones, Borja Sánchez, Montoro, Luismi, Viti, Hugo Rama y Borja Bastón.

 

Igualdá y muncho respetu ente dambos conxuntos. Eso ye lo que pudo vese nos primeres compases del alcuentru. Los uvieinos, conscientes de la necesidá que tenía ganar nel día de güei, trataron de volver recuperar la so solidez defensiva y evitar qu'el Leganés llegara con peligru sobro la meta de Braat.

 

Cuando yá trescurriera la primera media hora de partíu, Borja Bastón protagonizaría l'acción más clara del primer tiempu nel 36´. El madrilanu aprovechó a la perfección una gran asistencia de Borja Sánchez pa superar a Riesgo y anotar el primeru. Sicasí, el so tantu foi invalidáu per fora de xuegu.

 

La ocasión activó a los carbayones que namái cuatro minutos dempués gociaríen d'otra gran oportunidá p'adelantrase nel marcador. Nesta ocasión, Borja Sánchez a puntu tuvo de materializar una gran acción de Viti por derecha, anque'l so remate foi estenáu pola zaga madrilana. Tres estes dos bones acciones del Real Oviedo, el Leganés tendría'l retruque con un remate al palu de Juan Muñoz a la salida d'un córner. Amás, los locales tamién dispondríen d'una bona oportunidá al filu del descansu pero Braat, con una gran intervención, caltuvo'l 0-0 inicial.

 

Tres la continuación, los azules llevaron la batuta del alcuentru en tou momentu y buscaron insistentemente el tantu de la victoria. La primer ocasión túvola Borja Sánchez nuevamente. El “10”, nel 61´, aprovechó un balón muertu nel puntu de penalti pa probar suerte pero'l so disparu colóse alto. Diez minutos más tarde sería Viti Rozada ´l qu'a puntu taría de decantar la balanza pal cuadru d'Álvaro Cervera. El futbolista de La Pola Llaviana remataba un centru de Lucas pero'l so disparu colábase llixeramente esviáu.

 

El Real Oviedo raspiaba'l gol hasta que nel 76´ llegaría'l tantu uvieín. Una gran acción de Lucas Ahijado per banda derecha terminó con una cabezada perfecta de Luismi pa poner el primeru. Golazu del conxuntu carbayón pa facer xusticia sobro vistir nel terrén de xuegu.

 

Los azules aguantaron a la perfección la ventaya nel marcador mientres los últimos minutos del partíu y collecharon un trunfu perimportante pa recuperar enfotu y alloñar de la zona baxa de la tabla. Trés puntos más nel casillero del Real Oviedo qu'asitia a los asturianos decimocuartos na tabla con 39 puntos a falta de que remate la xornada.