Ganar pa tornar a la sienda de la victoria. Con esa intención llegaba'l Real Oviedo a esta xornada númberu 16 de LaLiga Hypermotion na que'l conxuntu azul midióse a la SD Eibar nel Carlos Tartiere. Los uvieinos yeren conscientes de la importancia de consiguir güei los trés puntos y pa ello'l técnicu catalán, Luis Carrión, allinió un once formáu por: Leo Román, Lucas, Costas, Dani Calvo, Abel Bretones, Colombatto, Luismi, Paulino, Viti, Seoane y Borja Bastón.

La posesión y el dominiu del alcuentru tuvieron partíes mientres la primer metá na qu'hubo momentos pa los dos conxuntos. Tres dellos minutos d'igualdá, el carbayones tendríen la más clara de la primer metá nes botes de Santiago Colombatto. El mediocampista punxo un centru envelenáu dende la banda que terminó impactando contra'l llargueru de la meta defendida por Luca Zidane. La SD Eibar salvó del primer tantu anque'l retruque del conxuntu armeru nun tardaría en llegar. Nel minutu 42, Bautista nun perdonaba ante Leo Román tres una bona xugada del cuadru visitante y ponía el 0-1.

Tres la continuación, el Real Oviedo metió una marcha más y eso notóse dende l'entamu. Nel 59´, Borja Bastón igualaba'l choque con un tanto de cabeza y el Tartiere veníase enriba pa encarar la segunda metá. La superioridá de los uvieinos rescampló mientres los segundos 45 minutos y el combináu de Luis Carrión nun dexó d'atacar y buscó el tantu de la victoria énte un Eibar qu'apenes triaba'l campu carbayono con peligru. Sebas Moyano, Alemao y Masca entraben al campu pa buscar el 2-1 que terminaría llegando nel minutu 89´. El colexáu, en siendo avisáu pol VAR, señaló penalti y Colombatto foi l'encargáu d'asumir la responsabilidá. El "11" nun falló dende'l puntu de penalti y el Real Oviedo certificaba una gran remontada pa faer cimblar al Carlos Tartiere.

Trés puntos perimportantes que se queden en casa y que faen a los de Luis Carrión ponese con 22 puntos na clasificación. Tres esti trunfu, l'equipu va volver a los entrenamientos el próximu miércoles pa empezar a preparar el so próximu compromisu ligueru énte'l Mirandés.