Siguir suañando cola Copa del Rei. Con esa idea llegaba'l Real Oviedo a esta segunda ronda de la competición na que'l conxuntu azul víase les cares col CD Castellón. Tres la victoria énte'l RCD Espanyol, el combináu de Luis Carrión viaxaba hasta la Comunidad Valenciana pa encarar un partíu complicáu en Castalia onde l'entrenador catalán allinió un once formáu por Braat, Lucas, Luengo, Dani Calvo, Pomares, Camarasa, Jimmy, Sebas Moyano, Sesé, Álex Cardero y Alemão.

Cola esixencia ya importancia que merez la Copa del Rei. Asina salió'l Real Oviedo al partíu. Los asturianos entraron al alcuentru con una marcha más y nos primeros minutos tendríen trés bones acciones de peligru. Alemão y Sesé protagonizaron los dos causes nes que los azules pudieron ponese per delantre pero dos bones acciones de la meta local evitaron el primeru.

Tres el gran aceleríu uvieín, el partíu igualóse y el CD Castellón asitióse sobro'l terrén de xuegu. El choque trescurría con igualdá hasta que nel 39' Sueru anotó'l 1-0. Una bona xugada de Traore per banda terminó col primer tantu del partíu que facía que los castellonenses dir por delantre al descansu.

Tres el pasu por vestuarios, Gronning marcó'l 2-0 y punxo el partíu bien cuesta arriba pa los nuesos. Les coses nun ameyoraríen y ye que nel 55' Traore cayó dientro de la área y el colexáu señaló penalti. Braat apaecía y caltenía a los suyos con vida. Darréu, nel minutu 56, Alemão retayó distancies y punxo el 2-1 nel lluminosu.

Seoane y Colombatto entraron al terrén de xuegu pa tratar de da-y la vuelta al alcuentru anque'l conxuntu azul nun consiguió la igualada. Bastón y Masca tamién salieron al campu pero les coses nun camudaron. Sebas Moyano tendría la más clara del segundu tiempu en rematando fuera un bon centru de Pomares dende esquierda. Bastón a la media vuelta tamién tendría otra gran acción de peligru pa igualar el choque pero'l so disparu salió centráu y el porteru pudo atrapalo ensin problemes.

El Real Oviedo entornó mientres los últimos minutos del partíu pero nun llogró'l premiu del gol. Dura derrota que fai que los uvieinos despidiéronse  de la Copa del Rei esta temporada y yá piensen nel importante partíu d'esti domingu énte'l Racing de Santander n'El Sardineru.