El Real Oviedo nun pudo puntuar na so visita al Riyadh Air Metropolitano, onde cayó por 2-0 ante l'Atlético de Madrid nel alcuentru correspondiente a la xornada 14 del campeonatu lligueru. Un entamu mui eficaz del conxuntu rojiblancu marcó'l rumbu d'un partíu que, a pesar del bon entamu de los azules na segunda metá, quedó encarriláu dende los primeros compases.

L'Atlético impunxo la so llei na primer parte. La presión alta y la velocidá nel xuegu de los homes de Simeone dificultaron la salida de balón oviedista, que sufrió pa asitiase nel campu contrariu. Sorloth, mui activu y certeru, firmó un doblete en apenas diez minutos: primero nel 16’, culminando una gran xugada combinativa, y de nuevu nel 26’, aprovechando un unviu al área que remató cola izquierda. Col 2-0, el choque inclinábase claramente del llau local. L'Oviedo intentólo, pero namái llogró inquiedar a Oblak nun remate de cabeza de Viñas que'l guardameta atrapó ensin dificultaes.

La segunda metá amosó una meyor versión del conxuntu oviedista. Los de Luis Carrión dieron un pasu alantre, ganaron metros y xugaron mientres munchos minutos nel campu rojiblancu. Les ocasiones llegaron, pero nin Viñas nin Rondón acertaron nos sos tiros, dambos desviaos. La nota negativa foi la lesión de Carmo, obligáu a abandonar el terrén de xuegu y sustituyíu por Calvo.

Col marcador a favor, l'Atlético reduxo revoluciones y limitóse a controlar el ritmu del partíu. Sicasí, l'Oviedo introduxo frescura dende'l banquín coles entraes d'Ovie, Forés, Reina y Ilic, buscando un gol que los metiera de llenu nel alcuentru. La más clara del tramu final, sicasí, llegó pa los locales: Simeone plantóse solu ante Aarón, que firmó una parada soberbia ante la "picadina" del arxentín.

Nun hubo tiempu pa más. El Real Oviedo intentólo pero tornó de vacíu del Metropolitano tres un alcuentru marcáu pola pegada inicial del Atlético. Agora, los azules yá piensen na próxima xornada que los enfrentará al Mallorca nel Carlos Tartiere.