Esti mañán compareció en rueda de prensa pa atender a los medios presentes na ciudá deportiva d'El Requexón, Nacho Vidal. El defensa del Real Oviedo foi cuestionáu pol estáu anímicu del equipu: "Veo a la xente metida y concienciada, sabiendo na situación na que tamos, pero esti equipu representame y va lluchar hasta'l final. Vamos a un rival complicáu pero tamos xugándonos la vida y eso tien que poder más que nengún rival".

Sobre'l próximu rival, el defensor azul señalaba, "el Celta ye un equipu que me presta, un equipu mui dinámicu que propón coses diferentes con muncho talentu. La nuestra prioridá nun ye poner el focu nel rival porque en Primera toos son complicaos. Hai que poner el focu en nós mesmos y intentar facer dañu a cualquier rival porque podemos facelo".

Una nueva final pal conxuntu d'Almada. "Llevamos muncho tiempu falando de finales, pero l'Oviedo lleva muncho tiempu ensin tar en Primera y la manera d'afrontalo ye esta. Cada partíu tien que estimulanos. Vas gastando bales y ye una realidá que necesitamos afrontar cada partíu como una final".

Preguntáu sobre les posibilidaes del equipu de salvar, afirmaba: "Falar de matemátiques penalízanos muncho más de lo que nos da. Debemos ser quien a pensar nel güei y nel mañana y preparar el día a día pa llegar de la meyor manera al partíu del domingu. Tolos cálculos nun sirven de nada. Nós debemos pensar nel domingu y si ganamos vamos tener 27 puntos". Pa finalizar añadiendo, "too pasa poles ocho xornaes que queden y tenemos capacidá pa sacar puntos en tolos campos".