El tercer amistosu de la pretemporada llevó a los azules hasta Llión pa vese les cares cola Cultural Lleonesa na Área Deportiva de Puente Castro, con derrota azul al fin de los 90 minutos, anque los de la capital del Principáu suman minutos y trabayu na cuarta selmana de preparación.

Para'l choque ente'l conxuntu lleonés, el preparador oviedista punxo en tema un once formáu por Femenías; Lucas, Grippo, Bolaño, Mossa; Sangalli, Jimmy, Alex Cardero; Jirka, Obeng y Borja Sánchez, siguiendo col 4-3-3 que lleva utilizando nos partíos apostaos nesta pretemporada.

La primer metá, na que los locales punxéronse por delantre con un gran gol, decantóse del llau carbayón en xuegu y ocasiones, colos homes de banda bien activos, aprovechando los cambeos de posición entre llaterales y estremos para buscar los primeros acercamientos. La Cultural adelantróse nel marcador con un bon tiru dende fora de la área ante'l que Joan Femenías nun pudo faer nada, y col que'l Real Oviedo metió-y una marcha más al partíu, buscando la portería de Dani Sotres en cada ataque.  Sangalli, Obeng y Borja Sánchez trataron de poner les tables nel marcador, pero nun materializaron les ocasiones de les que dispunxeron.

Nel segundu actu, onde al empiezu Ziganda dio entrada a Javi Mier por Borja Sánchez, los azules punxeron les tables nel marcador, aprovechando una bona combinación entre Sangalli y Mossa, acabó col pase del valencianu a Obeng que remató a placer. Cucio Ziganda movió'l banquín, con diez cambeos, dexando namái a Javi Mier sobre'l verde. La Cultural punxo'l segundu nel lluminosu, y el partíu entró nuna fase d'intercambiu de golpes para cada equipu, con un Real Oviedo que nun dexó d'intentalo hasta'l final.

Los azules van siguir mañana'l trabayu preparatorio n'El Requexón, centraos na siguiente cita de pretemporada, el sábadu énte'l CD Lugo en Ribadeo.