El Real Oviedo ponía rumbu nesta ocasión hasta tierres manchegues pa midise al Albacete BP na decimocuarta xornada de LaLiga Hypermotion. En consiguiendo los trés puntos énte'l Burgos CF, el conxuntu azul llegaba a esti alcuentru coles mires de sumar de trés llueñe del Tartiere y siguir afitándose na zona alta de la tabla. Pa esti choque, el técnicu Javi Calleja allinió un once formáu por: Aarón Escandell, Rahim, Dani Calvo, Jaime Vázquez, Luengo, Sibo, Colombatto, Cazorla, Chaira, Hassan y Alemão.

 

La igualdá y el respetu de dambos conxuntos foi notable nos primeres compases del partíu. Dos dures entraes de Rai y Juanma terminaron con tarxeta mariella pa dambos y foi lo más significativo hasta que Alemão abrió la llata pa los de la capital del Principáu. El brasileñu fízose con un mal estene de la zaga local pa bater cola pierna derecha a Lizoain y poner el primeru. Gran gol de delanteru total y 0-1 nel marcador.

 

El duelu poníase bien de cara pa los de Javi Calleja anque nel descuentu de la primer metá l'Albacete llograría l'empate. Rahim, non bien acertáu, cometió penalti claru sobro Rueda y Quiles nun falló dende los once metros pa poner les tables. 1-1 y tou por decidir pa los segundos 45 minutos.

 

Tres la continuación, el Real Oviedo volvió ponese per delantre gracies a otru gol de Alemão. El brasileñu foi'l más llistu de la clase y aprovechó un refugue de la meta local a tiru de Cazorla pa poner el 1-2. El siguidores azules movíos al Carlos Belmonte festexaron el tantu azul anque l'allegría nun duró enforma. Trés minutos más tarde, Rueda fusiló a Escandell, tres una bona asistencia de Riki, y l'empate volvía a imperar nel marcador. El partíu taba llocu y tres el 2-2 Javi Calleja introdució los primeros cambeos y dio entrada a Paraschiv y Sebas Moyano en llugar de Hassan y Cazorla.

 

Un disparu de Chaira dende fora de la área y una cayida de Alemão na área, na que l'árbitru nun indicó nada, fueron los aproximamientos de más peligru del cuadru carbayón. Yá nos postreros diez minutos de partíu, Dotor y Lucas entraron al terrén de xuegu por Sibo y Luengo anque la resultancia nun se movió. 

 

Repartida de puntos nel Carlos Belmonte que dexa al combináu asturianu cuartu na clasificación con 23 puntos.