El Real Oviedo cerraba la xornada númberu 40 de LaLiga Hypermotion nun partíu d'altos vuelos énte'l RCD Espanyol. Los azules, coles mires de dar un golpe enriba de la mesa, llegaben a esti alcuentru en superando por 1-0 al Real Zaragoza nel Carlos Tartiere la pasada fin de selmana. Pa esta ocasión, el técnicu del combináu carbayón, Luis Carrión, allinió un once formáu por: Leo Román, Viti, Oier Luengo, Dani Calvo, Pomares, Colombatto, Seoane, Cazorla, Masca, Borja Sánchez y Alemao.

Nun pudieron salir meyor los asturianos al Stage Front Stadium. Nel primer minutu una acción a balón paráu terminó con gol de Masca de cabeza anque'l so tantu foi anuláu per fora de xuegu previu del portugués. La decisión nun camudó los planes de los uvieinos que sometieron al RCD Espanyol mientres los primeres 45 minutos roblando un primer tiempu sobresaliente. Alemao, con una bona xugada individual, y Dani Calvo, con una cabezada, raspiaron el primeru énte un cuadru, el local, qu'apenes llegaba con peligru sobro la meta de Leo Román.

Antes del minutu 20, Masca de cabeza tuvo la más clara pero'l so testerazu foi estenáu por Joan García con una bona intervención. Magar otra acción que nun atopaba portería, la insistencia azul tendría'l so premiu nel 23´ col gol de Oier Luengo. Un córner botáu por Cazorla foi rematáu pol zagueru del Real Oviedo pa bater a la meta local y poner el 1-0. Nel 32´, y nuna de los pocos aproximamientos del conxuntu catalán, Keidi Bari cayó na área y el colexáu en siendo avisáu pol VAR indicó penalti per pisotada de Colombatto. Braithwaite nun falló dende los once metros y el gol subió al marcador.

Los de Carrión supieron reponese y nel 38´, y otra vegada a balón paráu, Dani Calvo volvía poner en ventaya los de la capital del Principáu. Cuando los futbolistes del Real Uviéu festexaben el tantu, l'árbitru, Lax Franco, foi al monitor yá que dende'l VAR indicáron-y un fora de xuegu de Alemao. Según el criteriu del colexáu, el brasileñu torgaba al defensor estenar el remate de Dani Calvo en llínea de gol. El tantu, de forma incomprensible, nun xubía al marcador énte la incredulidá de los futbolistes del cuadru carbayón y de los oviedistas presentes en Barcelona que nun entendíen nada. Descansu.

Tres la continuación, y nel 63´, Leandro Cabrera adelantró al RCD Espanyol con un remate de cabeza tres un córner. El remate del defensor tocó nel cuerpu de Alemao qu'esvió la unviada y torgó que Leo Román pudiera detenelo. Cuando paecía que namás podía pasar, la mala fortuna tamién-y xugaba una mala pasada a los asturianos que se poníen por detrás nel marcador. Dubasin, Paulino, Bretones y Bastón ingresaron al terrén de xuegu na segunda parte pa tratar de camudar les coses anque l'empate nun llegó. Millán tamién salió nos últimos minutos y foi Colombatto el futbolista que tuvo la más clara anque Joan García, cola cara, evitó'l gol del empate.

El Real Oviedo, magar les ocasiones xeneraes y la gran primer parte, coló de vacíu de Barcelona nun choque marcáu poles decisiones arbitrales. Agora, y ensin tiempu pa llamentar, toca pensar nel partíu ante l'Andorra y nos dos finales que queden p'apostar, a final de temporada, el playoff d'ascensu a Primera División.