28.126 espectadores diéronse cita esti sábadu nel Carlos Tartiere pa vivir l'alcuentru d'ida de la primer semifinal del playoff d'ascensu a Primera División. Sol lema "Guardianes de l'ayalga y del llugar", y con un tifu espectacular, el Real Oviedo encaraba'l primer coche de la promoción d'ascensu énte la SD Eibar onde Luis Carrión introdució delles novedaes nel once titular y formó d'entamu con: Leo Román, Viti, Oier Luengo, Dani Calvo, Pomares, Colombatto, Luismi, Borja Sánchez, Sebas Moyano, Borja Bastón y Alemão.

Salió bien al partíu'l cuadru carbayón. L'emburrie y ambientazo del municipal uvieín llevó a les arandines al equipu nos primeres compases onde la posesión y el balón foi pa los locales. Magar la insistencia azul, la primer ocasión de peligru foi pa los de Etxeberria. Stoichkov, tres una bona xugada combinativa, remató dientro de la área anque la so cuto colóse raspiando'l palu. El retruque carbayón nun tardó en llegar y nel 20', Colombatto protagonizó la primer clara pal Real Oviedo. L'arxentín, tres una bona paré con Alemão, remató dende la fronteru pero'l so chut foise esviáu.

Yá en cantu del descansu, Alemão remató de cabeza un saque de banda colgáu a la área. Sicasí, una gran mano de Luca Zidane evitó'l 1-0. Con esa última acción, el choque llegaba al descansu onde la igualdá predominó nun primer periodu ensin munches ocasiones de gol. Tres la continuación, 

l´Oviedo volvió salir a mandar y nel 51' un bon centru de Borja Sánchez dende la esquierda pasiar por llínea de gol onde nin Bastón nin tampoco Alemão pudieron llegar al remate.

Nel 64´, Luis Carrión realizó'l primer cambéu del partíu y dio entrada a Dubasin en llugar de Borja Sánchez. La igualdá siguía presente y nengunu de los dos combinaos yera capaz d'abril el marcador. Paulino de la Fuente y Álex Millán dieron piernes fresques al equipu y sustituyeron a Sebas Moyano y a Borja Bastón ente que la SD Eibar realizaba'l so primer cambéu, tamién nel minutu 75, cola entrada al terrén de xuegu de Sergio Álvarez.

Los últimos minutos del partíu fixeron que'l cuadru uvieín, gracies a un Tartiere que nun dexó d'animar, volviera emburriar y someter a un cuadru armeru que quería salir de la capital asturiana cola so meta a cero. Paulino tendría la más clara con una gran cabezada tres centru d'Abel Bretones que la meta visitante, con un paradón, mandó a saque d'esquina. 0-0 y puntu y final al partíu d'ida de la primer semifinal de los playoff d'ascensu a Primera División.

Agora, y con apenes trés díes de trabayu, el Real Oviedo yá piensa na final de Ipurúa onde tou ta por decidir y onde Real Oviedo como SD Eibar van buscar un billete pa la final del playoff.