El Real Oviedo cayó derrotáu por 3-0 ante’l Real Betis nun mal partíu del conxuntu azul, que foi superáu en tou momentu.

El equipu azul entamó l’alcuentru con personalidá, firmando la primer ocasión clara del partíu tres un disparu d’Ilyas Chaira que obligó a intervenir a Valles. Sicasí, col pasu de los minutos, el Real Betis foi imponiendo’l so ritmu y entamó a facese dueñu del balón y del territoriu, llevando’l peligru de manera constante sobre la portería defendida por Aarón.

El cuadru verdiblancu atopó premiu a la so insistencia mediáu’l primer tiempu, cuando Cucho Hernández llogró abrir el marcador tres una aición bien ellaborada en campu rival. El gol reforzó’l dominiu del Betis, que siguió xenerando llegaes y obligando al Oviedo a replegase y resistir les acometíes llocales.

Enantes del descansu, l’alcuentru dexó tamién la polémica, con una aición sobre Thiago Almada dientro del área que’l conxuntu carbayón reclamó como penalti, anque nin l’árbitru nin el VAR señalaron infracción. Poco dempués, Ez Abde amplió la ventaxa pal Betis, estableciendo’l 2-0 col que se llegó al descansu.

El segundu tiempu nun entamó con bones noticies pal Real Oviedo. Namái unos minutos dempués de la reanudación, el Real Betis volvió golpiar, con un nuevu tanto de Cucho Hernández que ampliaba la ventaxa llocal y dexaba l’alcuentru mui cuesta enriba pa los carbayones. Enantes d’esi tercer golpiu, l’Oviedo atopara portería por mediu de Fede Viñas, pero’l gol foi anuláu por fuera de xuegu.

Buscando una reacción, el técnicu Guillermo Almada introduxo cambeos nel segundu periodu, dando entrada a Santi Cazorla, Sibo y Hassan. L’equipu intentó ganar presencia en campu rival y tener más control del balón, pero’l desenvolvimientu del partíu nun camudó enforma ante un Betis firme y bien plantáu.

Col pasu de los minutos, el ritmu del partíu foi baxando, anque siempres baxo’l control del conxuntu verdiblancu, que supo xestionar la so ventaxa ensin grandes sobresaltos. El Real Oviedo nun atopó la fórmula pa metese otra vegada nel choque y acabó sumando una nueva derrota tres un partíu gris.