El Real Uviéu volvió cola cabeza alta d’El Molinón catorce años depués. El conxuntu uviedista, colos xustos, encaró’l partíu cola novedá de Mossa na banda esquierda, y aguantó nos primeros minutos de tu a tu a los locales. El gol de Carmona adelantó al Sporting nuna xugada a balón paráu, pero’l Real Uviéu respondió con una ocasión doble de Toché tornada por Mariño, con remate de Saúl al refugue, unviáu a córner pola defensa. El conxuntu uviedista nun-y perdió la cara al partíu y marchó vivu al descansu.

Na segunda y con dellos cambeos, los azules salieron meyor y a lo llargo de munchos minutos zarraron al Sporting en campu propiu. Verdés demasiao forzáu pal remate nel segundu palu y depués Carlos Hernández, en xugada a balón paráu, tuvieron les más clares. Nun diba ser hasta’l tramu final del alcuentru cuando Toché diba topar, al refugue, el premiu trabayáu y buscáu pol Real Uviéu, col gol del empate que facía xusticia en marcador.

Los 1.200 uviedistes desplazaos a El Molinón coriaron a los suyos munchos minutos depués d’acabar el partíu, y l’equipu agradeció’l so aliendu y ciñu volviendo salir al terrén de xuegu.