El Real Uviéu firmó ún de los sos meyores partíos lloñe del Tartiere pa sumar la tercer victoria siguida del 2019, énte un Extremadura al que foi superior a lo llargo de la mayor
parte del alcuentru.
Con cambeos nel once, la entrada de Mossa y Carlos Martínez poles ausencies de Christian Fernández y Omar Ramos, el Real Uviéu respondía con poderíu a la intensidá cola que l’Extremadura salió al partíu. A los dos minutos Johannesson llantábase n’área pequeña pa namás tener qu’emburriar un centru rasu de Mossa dende la esquierda, pero nun atinaba nel remate. Poco depués yera’l valencianu’l que probaba con un disparu entornáu a la esquierda que marchaba fuera. L’Extremadura buscaba a Champagne con balones en llargo al llombu de la defensa uviedista, pero’l meta respondía con seguranza. Pasada la media hora de partíu, llegaba’l premiu a la insistencia del Real Uviéu y el bon trabayu desplegáu hasta’l momentu. Joselu anotaba nel primer palu depués de tocar de cabeza Carlos Hernández na derecha. Medraba l’equipu d’Anquela, que tocaba y tocaba hasta trenzar una xugada bien guapa que podía rematar Folch nel cero a dos. Unvió fuera.
Depués del descansu, les ocasiones siguieron y el dominiu tamién. Bárcenas remataba en carrera atopándose con Álvaro Fernández. Yera precisamente’l panameñu’l que remataba de primeres el centru de Carlos Martínez, y sentenciaba col cero a dos definitivu. L’Extremadura aplicóse n’ataque y el Real Uviéu, tamién colos cambeos, caltúvose cola mesma solvencia defensiva.
Una victoria nueva pa los d’Anquela que mañana van exercitase en Les Caldes en sesión rexenerativa dende les 17:00 hores.
