A pesar de que tuvo cerca, el Real Uviéu nuevu d'Anquela nun foi quién a sumar la primer victoria de la temporada nun partíu que foi en tou momentu uviedista, en posesión, xuegu y ocasiones, énte un Extremadura que sacó tol provechu posible del so balón paráu.
Formó'l técnicu uviedista con dellos de los refuerzos n'once titular, un mediu del prau inéditu en competición oficial, Bárcenas y Berjón nes bandes y Toché en punta. El dominiu azul empezó dende los primeros minutos, y depués de los primeros avisos, el gol de Toché nun diba facese aguardar. Un gran pase de Mossa dende la banda esquierda dexaba al delanteru cara a cara con Manu García n'área, pa rematar cola esquierda y poner el marcador a favor. Siguió la posesión del Real Uviéu y, anque con bon toque y buscando l'ataque, el siguiente averamientu claru foi nun disparu de Tejera dende la frontal que marchó altu.
Depués del descansu aumentaron les llegaes. Primero con un disparu potente de Boateng, depués con un remate de Javi Muñoz que buscaba la escuadra, y yá cola entrada d'Ibra en sustitución de Toché, llegaba la más clara del partíu. Nuna contra que dexaba solu al ariete entrando n'área, Pardo llegó per detrás xusto cuando diba rematar pa tocar la cuenta y unviar a córner. Llegó entós l'empate, nun llanzamientu de córner que, depués d'una primer peñada de Willy quedó a los pies d'Alex Barrera, que namás tuvo qu'emburriar. Saúl Berjón respondía con un llanzamientu potente dende la frontal, que buscaba'l segundu palu, y que Manu García tocaba lo xusto pa unviar a córner. Tamién Javi Muñoz remataba en llinia de fondu, de primeres, un balón que volvía tornar el meta del conxuntu estremeñu. L'últimu remate foi de Joselu, de cabeza, y volvió acabar en córner depués d'una mano de Manu García.
El próximu entrenamientu del equipu va ser el martes, a les 10:00 hores, n'El Requexón.
AST
