El Real Uviéu sigue sumando victories no que va del 2019 y, nesti casu, la primera del añu nel Carlos Tartiere.
L’equipu volvió sufrir un contratiempu nel calentamientu, cola lesión de Viti que-y dio entrada a Omar Ramos nel once. El Real Uviéu dominó dende’l principiu, con una gran intensidá y control del partíu. Les llegaes uviedistes yeren constantes, y nun pasaren diez minutos cuando Omar Ramos afrellaba un balón en llargueru, depués de disparar dende la frontal y envelenase al tocar nun defensa tinerfeñu. Yoel Bárcenas tuvo la d’él nun llanzamientu directu de falta que marchó esviáu por poco, pero repúnxose anotando un golazu poco más tarde, nun xu dende la frontal del área que ponía l’un a cero nel partíu. Mancábase entós Omar Ramos, y sustituyíalu Mossa ocupando la posición de Yoel, y cambiándo’l panameñu a la derecha.
Depués del descansu’l Real Uviéu recuperó la intensidá, pero costába-y más llegar al área rival. Un cabecéu a balón paráu de Carlos Hernández marchó esviáu por poco. El Real Uviéu llegaba, pero costába-y rematar, y el partíu rompió con dalguna llegada más en velocidá d’un Tenerife que nun punxo n’apuros a Champagne. Dellos centros al área que tornó la defensa canaria y dos remates nuna mesma xugada tamién salvaos pola zaga tinerfeña dicíen que’l Real Uviéu siguía intentándolo. La más clara foi de Johannesson nel añedíu, nun bon remate depués de xugada dende la derecha qu’acabó en parada del meta visitante.
A la fin, un trunfu importante pal equipu d’Anquela, que va tener descansu hasta’l martes, cuando vuelva a los entrenamientos n’El Requexón.
