Real Uviéu: Champagne; Carlos Martínez, Forlín, Javi Herández, Lobato; Ramón Folch, Boateng, Javi Muñoz, Aarón Ñíguez, Saúl Berjón y Steven. Na segunda metá xugaron: Alfonso Herrero (ps), Johannesson, Carlos Hdez., Josín, Mossa; Lucas, Tejera, Edu Cortina, Borja; Asier y Toché.
UD Sanse: Carlos Morales, Rubén Valverde, Mario, Gonzalo, Bruno, Zazo, Carlos Portero, Galindo, Castell, Prada y Rubén Sánchez. Tamién xugaron: Denis (ps), Steven, José Carlos, Luis Enrique, Astray, Andy, Miki, Perales, Giovanni, Fran Pastor y Iván Pérez.
Goles: (1-0) Steven, min 15. (2-0) Steven, min 42. (3-0) Toché, min 84.
El segundu amistosu de la pretemporada repitió escenariu, y estrenó primer equipación, anque marcáu pol agua, qu'en dalgunos minutos foi protagonista n'El Requexón. L'equipu de Juan Antonio Anquela dominó, con xuegu, ocasiones y goles, a la UD Sanse, que cuasimente nun punxo a prueba nin a Champagne na primer metá, nin a Alfonso na segunda.
Empezó l'alcuentru con un once titular onde Steven yera referencia en punta, arropáu por Saúl y Aarón nes bandes. De dambos estremos foron precisamente los dos primeros averamientos, con remates que marcharon esviaos. Nel minutu 15 de partíu, y depués d'una bona xugada de combinación, llegaba'l primer gol del alcuentru, obra de Steven. Aumentó la intensidá del agua, y baxaron en númberu les ocasiones. Lucas sutituyó a Carlos Martínez tres de volver completar daqué más de media hora de partíu y dir ameyorando en ritmu y sensaciones pal llateral derechu, y a puntu del descansu llegaba'l segundu pa los azules. Otra vez Steven, nesti casu rematando un pase rasu de Saúl Berjón en llegada dende la esquierda, ponía'l dos a cero pal Real Uviéu. Primero d'entrar a vestuarios Aarón y Boateng, con refugues del porteru nos sos remates, protagonizaben la última acción de peligru uviedista.
Na segunda Anquela anovó l'once dafechu, volviendo alternar presencia de xugadores del primer equipu con futbolistes que tán realizando la pretemporada cola primer plantiya. Toché tenía la más clara nel minutu 52, rematando de cabeza a centru de Tejera. El balón marchó raspiando'l poste. Remates primero d'Asier, y depués de Toché al llau de la rede pudieron ampliar el marcador. Foi nel 84 cuando, nun saque d'esquina sacáu por Tejera, cuando'l nueve uviedista anotó'l tercer y definitivu gol del partíu. Toché firmaba de cabeza el trés a cero. Una ocasión más de Carlos Hernández ponía'l puntu y final al segundu ensayu de pretemporada, n'El Requexón.
El primer equipu va disfrutar mañana de xornada de descansu, y van volver los entrenamientos el llunes a les 18:30h n'El Requexón.
AST
