El Real Uviéu volvió ganar y fíxolo énte la so xente. Más de dos mil uviedistes tiñeron Lugo d’azul y emburriaron pa que los trés puntos volvieren a Uviéu.
Anquela apostó por un cambéu de sistema con dos modificaciones nel once. Mossa quedó nel bancu nuna defensa de cuatro onde los demás foron los avezaos, y Mariga volvió al mediu del prau al llau de Rocha. Asina empezó un alcuentru onde’l Real Uviéu caltuvo la seriedá a lo llargo de tol partíu. El primer averamientu foi en llanzamientu de falta, con remate de Fabbrini p’acabar xugada, que marchó alta. Saúl probó suerte minutos más tarde, con un disparu cruciáu dende la esquierda. El Lugo nun foi quién a garrar el control del balón, y el Real Uviéu, anque con averamientos, nun foi a crear demasiáu peligru.
Na segunda’l conxuntu uviedista punxo una marcha más pa dir a pol partíu, pero la primer intervención foi d’Alfonso, con un paradón pa unviar a córner un disparu de Fede Vico n’área. L’equipu d’Anquela respondió con una bona ocasión, que remató Toché pero mui forciáu nel segundu palu, depués de sacar rápido una falta y peñala Christian. Fabbrini tuvo la siguiente, nun remate tres de contra uviedista, que tornó’l porteru local. Kravets foi espulsáu por doble mariella depués d’una entrada dura a Cotugno, y el Real Uviéu quedó con ún más con venti minutos per delantre. Anquela dio-y entrada a Johannesson, y Toché volvió rematar forciáu un centru de Saúl, dende la esquierda. Mossa entraba dende’l bancu pa refrescar l’ataque, y nel 81 llegó’l gol. Una xugada na que Johanneson se vio solu énte la portería lucense, depués d’un centru d’Aarón qu’acabó con Toché valtáu n’área, y sentenció col cero a un que-y diba dar la victoria al conxuntu uviedista.
L’equipu vuelve a Uviéu pa empezar colos entrenamientos mañana, dende les 10:30 hores, n’El Requexón.
