La Romareda acoyó la docena xornada para los de Ziganda, que visitaron al Real Zaragoza, cola resultancia de 1-2 a la fin de los noventa minutos.
Dándo-y continuidá l'once de la pasada xornada énte'l Castellón, los de Ziganda saltaron al verde del estadiu maño, nuna primer parte na que l'equipu salió ordenáu, llegando a la área rival, ensin materializar les ocasiones de les que disponía. Los de Ziganda controlaben el partíu, faciendo que'l Zaragoza tuviera problemes p'algamar la portería defendida por Femenías. Nuna xugada aisllada, el aragoneses anotaron el primer gol
nel lluminosu, cola ayuda de Bolaño. Esta circunstancia fixo que los azules se descolocaran y diéren-y aire al Real Zaragoza. Nos últimos minutos del primer actu los oviedistas recuperaron el balón, con más posesión y presencia en campu contrario. Na última xugada de la primer parte Borja Sánchez, con un bon remate de cabeza nun córner punxo'l tantu del empate.
Tres el pasu por vestuariu el carbayones volvieron salir aplicaos en defensa, ensin conceder ocasiones de gol. una xugada pela banda esquierda, empecipiáu por Mossa, favoreció'l centru al puntu de penalti, por que Blanco Leschuk anotara'l segundu tantu nel lluminosu, que s'estrena cola camiseta del Real Oviedo. Tres esti gol, los azules dispunxeron d'ocasiones pa sentenciar el partíu, ensin poder acabales. Samuel Obeng y Javi Mier fixeron entrada al terrén de xuegu, y darréu Lucas Ahijado y Cedric. El Zaragoza fixo'l control de xuegu, pero los azules aprovechaben les contras pa buscar abrir distancia nel marcador. Nuna d'estes xugaes, na que Nahuel quedábase solo énte'l porteru, un xugador zaragocista vio la tarxeta colorada al cortar la contra cola mano. Al filu del minutu 90, Femenías detuvo dos disparos locales.
Tercer victoria consecutivu pa los de Ziganda, que mañana vuelven a Asturies pa siguir preparando, dende'l domingu, l'alcuentru de la próxima fin de selmana énte el Fuenlabrada
