CD Lugo: Juan Carlos; Leuko, Bernardo, José Carlos, Kravets; Iriome, Azeez, Pita, Campillo;Dongou y Jona. Tamién xugaron: Vieira, Josete, Escriche, Seoane, Juan Muñiz, Cristian
Herrera, Aburjania y Borja San Emeterio.
Real Uviéu: Alfonso; Carlos Mtnez., Carlos Hdez., Javi Hdez., Christian Fdez.; Forlín, Javi Muñoz, Boateng; Johannesson, Yoel Bárcenas y Steven. Tamién xugaron: Champagne, Prendes, Mossa, Tejera, Borja Sánchez, Viti, Aarón Ñíguez y Sandoval.
Goles: Sandoval (0-1), min 84. Dani Escriche (1-1), min 84. Dani Escriche (2-1), min 89.
El Real Uviéu encaxó esta tarde en Xove la primer derrota de la pretemporada. Con una primer parte ensin goles, y ensin cuasimente ocasiones pa nengún de los dos conxuntos, Anquela formó con un once onde volvió cuntar con presencia de Javi Hernández en defensa, y cola referencia de Steven en punta. La ocasión más clara de la primer parte fabricóse entre Javi Muñoz, con un bon pase a Yoel Bárcenas, que la punxo a Steven n’área pequena pa que l’ariete rematare a gol, pero unvióla fuera. Alfonso intervieno a puntu de ser el descansu p’atayar la más clara del conxuntu gallegu, con un balón que diba axustáu al palu y que’l meta toledanu tornó con una gran mano.
Na segunda’l partíu garró otru ritmu gracies al ataque del Real Uviéu. Con más velocidá, asociación y llegada, el Real Uviéu dominó a les clares bona parte del segundu tiempu. Avisaba Steven con un remate altu tres de bon centru de Viti dende la derecha. Tamién Aarón afrellaba’l so disparu en poste, a pase del estremu de Llaviana. Entraron Prendes, Borja Sánchez y Sandoval y el conxuntu uviedista siguía asediando n’ataque. Un control y remate cruciáu d’Aarón volvió atrapalu’l meta gallegu evitando’l gol. Llegaba entós el tantu uviedista, nuna bona xugada ente Borja Sánchez, centru d’Aarón y pase de Johannesson pa que Sandoval fusilare n’área poniendo’l cero a un. Respondió’l Lugo col empate, y a puntu del final, con un disparu al refugue d’un córner qu’acabó nel dos a un definitivu.
El Real Uviéu va volver a los entrenamientos mañana, xueves, dende les 10:00 hores nel Carlos Tartiere, pa de siguío realizar la ufierta yá tradicional a Cuadonga.
