ALLINIACIONES
Real Uviéu: Alfonso; Carlos Martínez, Forlín, Christian Fdez., Javi Hdez.; Tejera, Edu Cortina, Javi Muñoz; Yoel Bárcenas, Saúl Berjón y Toché. Tamién xugaron: Johannesson, Carlos Hdez., Mossa, Boateng, Borja Sánchez, Ibra y Steven.
SD Huesca: Werner, Akapo, Semedo, Insua, Brezancic, Sastre, Melero, Gallar, Ferreiro, Longo y Cucho. Tamién xugaron: Miramón, Aguilera, Moi Gómez y Camacho.
Goles: Toché (1-0) de penalti, min 65. Camacho (1-1) de penalti, min 80. Ibra (2-1) de penalti, min 89.
Na penúltima prueba de pretemporada, el Real Uviéu amosó la so solidez defensiva énte un bon rival, col que bregó pola posesión de balón y énte’l que foi quién a imponese dende los once metros, con tolos goles del partíu anotaos dende’l puntu de penalti.
Volvió formar Anquela con presencia de canteranos nel once, y depués d’unos primeros minutos de dominiu alternu, los únicos averamientos llegaben a balón paráu. Una falta sobre Yoel Bárcenas na frontera llanzóse ensin crear peligru, y una bona internada de Carlos Martínez per banda acababa nun gran centru tornáu pola zaga del Huesca a córner. El Real Uviéu amosóse sólidu en defensa, ordenáu y ensin dexar averamientos claros del conxuntu oscense. Asina se llegó al descansu.
Na segunda y ensin introducir cambeos, el Real Uviéu aumentó’l dominiu del partíu y llegó’l primer gol, obra de Toché depués de mano de los locales n’área. Nun falló’l capitán uviedista, poniendo al conxuntu d’Anquela con ventaya en marcador. Alfonso tuvo un par d’intervenciones en dos remates claros que’l meta uviedista atayó con contundencia, pero depués de la entrada de seis cambeos una xugada n’área carbayona acabó con penalti de Tejera, que tresformó Camacho poniendo l’empate a un en marcador. A la fin, y depués de delles llegaes uviedistes, de nuevo una pena máxima dende los once metros foi executada pol debutante Ibra, qu’anotaba’l dos a un definitivu. Borja Sánchez tuvo la postrera nun refugue tres de llanzamientu de córner, que xutó dende la frontal, pero aparó Werner.
El Real Uviéu vuelve a casa depués del so penúltimu ensayu de pretemporada, con entrenamientu previstu pa mañana pela tarde n’El Requexón, y el postrer amistosu’l sábadu en Foz énte’l RC Deportivo a les 19:00 hores.
