Yá nun había resaca post derby y, anque menguáu poles baxes, el Real Uviéu respondió. Fíxolo coles ausencies de Forlín, Saúl Berjón y Tejera, los dos primeros por lesión y el terceru por sanción.
Costó-y al conxuntu uviedista na primer metá, anque foi dominador dafechu del alcuentru, y de la posesión, pero ensin peligru. Los pocos averamientos atayólos Edgar Badía, en remates d'Ibra, y depués Alanís remataba mui forciao nun balón paráu y marchaba fuera. Tampoco'l Reus nun inquietó en nengún momentu la portería de Champagne, de la que Linares, aclamáu pola so ex-afición y agora nes files del Reus, tuvo mui lloñe nos primeros cuarenta y cinco.
Na segunda metá foi otra historia. Anquela retocó l'esquema ensin cambiar los nomes, y Mossa anotaba cuando nun pasare nin un minutu dende l'empiezu, al refugue d'un primer remate que s'afrellaba en poste. Poco más tarde llegaba'l segundu, col Real Uviéu calteniendo la posesión, y tamién protagonista de les ocasiones. Yoel Bárcenas firmaba un tantu bien guapu, de falta directa, dende la frontal. Y Joselu facía'l terceru, al refugue del so propiu llanzamiento de penalti, nuna pena máxima por valtamientu de Johannesson n'área. El Reus apertó nos últimos compases del alcuentru, pero nun llevó premiu en forma de gol. Sí en munchu ciñu, nun Tartiere qu'ovacionó a Linares y corió'l nome nos útimos compases del alcuentru.
L'equipu va volver al trabayu mañana, dende les 10:30 hores en sesión rexenerativa en Les Caldes.
AST
