El Real Uviéu sumó la primer victoria de la temporada, y fíxolo nun partíu con munchos goles y onde los homes d'Anquela supieron caltener la ventaya en marcador a lo llargo de tol alcuentru.
Apostó'l técnicu uviedista pol mesmu once que la xornada pasada, y pocos minutos fixeron falta p'abrir el marcador. Nel seis, Saúl Berjón rubricaba'l primer gol del partíu nuna contra perfecta cocinada xunto a Yoel Bárcenas, que punxo l'asistencia. El Real Uviéu garraba ventaya nuna nueche de calor afogadizo que diba convertir el partíu nun festival de goles. Yoel Bárcenas tuvo la siguiente nuna bona xugada individual qu'atrapó Stefanovic y, depués de la parada pa la hidratación d'entrambos equipos, el panameñu firmaba'l segundu, a pase de Toché, enanchando la ventaya pal conxuntu uviedista. Tejera, que firmó un partíu tremendu, tuvo la d'él nun disparu rasu dende la esquierda, depués d'un saque d'esquina, que tornó'l meta local.
Depués del descansu, el Córdoba punxo la réplica. Alfonso Herrero intervieno con un paradón bárbaru qu'evitó'l primeru del Córdoba, anque nun diba tardar en llegar. Un minutu más tarde Alejandro Alfaro recortaba distancies pa los de Sandoval, y el Nuevo Arcángel arropaba a los sos, más cerca del empate. Javi Muñoz tuvo'l terceru nun remate entornáu a la esquierda del área que buscaba la escuadra contraria, y marchó fuera por poco. Diba ser Saúl Berjón el que diba rubricar el terceru, depués d'una gran xugada del equipu d'Anquela, qu'acabó con asistencia de Johannesson dende la derecha pa que l'uviedín firmare'l segundu na so cuenta particular. Forlín refrescaba l'equipu en cuenta de Boateng, pero l'equipu de Jose Ramón Sandoval tovía diba dar guerra. Piovaccani diba volver recortar distancies nel 72, col 2-3, y Saúl Berjón pidía'l cambéu. Aarón daba aire n'ataque, y el cuartu y definitivu gol uviedista volvía apaecer en botes de Yoel Bárcenas. El panameñu batía a placer, picando la cuenta'l balón, otra vez depués d'un bon balón en velocidá a la contra, y a pase de Toché.
Asina acababa un partíu frenéticu, que'l Real Uviéu trabayó pa llevar del Arcángel los primeros trés puntos de la temporada.
El próximu entrenamientu va ser el llunes a les 18:30 hores n'El Requexón.
