Trés puntos d'oru en Las Palmas

El Real Oviedo viaxaba esti domingu a les Isles Canaries para encarar una nueva xornada del campeonatu ligueru. Los azules encaraben nesta ocasión el partíu correspondiente a la xornada 35 de la LaLiga Smartbank pa midise a la UD Las Palmas nun choque que prometía complicáu. Los d'Álvaro Cervera formaben d'entamu con: Braat, Luengo, David Costas, Dani Calvo, Abel Bretones, Borja Sánchez, Koba, Luismi, Viti, Hugo Rama y Sergi Enrich.

 

Tres el gran partíu de los azules ente'l Eibar, la pasada xornada, el Real Oviedo salió a esti alcuentru cola mesma idea: caltener la so solidez defensiva y tratar de rentabilizar les sos ocasiones. Los primeros minutos del partíu tuvieron marcaos pola igualdá de dambos conxuntos y poles escases ocasiones de peligru que tuvieron dambos combinaos. El carbayones, pela so parte, caltuviéronse seguros en defensa y trataron de facer dañu al equipu local al traviés de contragolpes.

 

Nel 12', Hugo Rama protagonizó la primer oportunidá pa los uvieinos pero'l so remate de volea, tres una bona acción individual de Borja Sánchez, yera refugáu por un defensor. La UD Las Palmas tuvo'l retruque nes botes de Sandro pero'l so remate foi estenáu ensin problemes por Braat. El guion del choque nun camudó col pasu de los minutos y Viti, nel minutu 27, sería l'encargáu de rematar un nuevu acercamientu carbayón. El futbolista de La Pola Llaviana remataba de cabeza un centru d'Hugo Rama dende la derecha anque'l so testerazu acababa plácidamente nes manos de Á. Valles. Nos postreros compases del primer tiempu la igualdá volvería predominar y el 0-0 inicial sería la resultancia col que'l choque coló al descansu.

 

Tres la continuación, Álvaro Cervera veríase obligáu a efectuar el primer cambéu del alcuentru. Koba nun podía siguir sobro'l terrén de xuegu y Camarasa era l'escoyíu pa entrar nel so llugar. El Real Oviedo nun camudó'l so plan de partíu magar la sustitución y llogró siguir desempeñando un gran alcuentru en términos defensivos. Los locales nun llograben atopar la fórmula pa desarticular la defensa carbayona y seríen los azules los qu'anotaríen el primer tantu del choque. Viti Rozada protagonizó una gran xugada per banda derecha p'asistir a Borja Sánchez, qu'a prestar, ponía'l 0-1 nel marcador. Magnífica xugada del estremu diestru que sirvía pa poner per delantre a los uvieinos nun de los campos más complicaos de la categoría.

 

Nel 78', Moleiro metía'l mieu nel cuerpu a l'afición oviedista con un disparu dende fora de la área que s'estrellaba nel llargueru. Magar ello, los azules aguantaron la resultancia y yá nel descuentu Braat, con una gran mano, frenaba l'últimu ataque de los canarios con una gran intervención a un tiru de Loren, que'l colexáu terminaba invalidando per fora de xuegu. Magar esta acción, el Real Oviedo supo caltener la so ventaya y caltener la so portería a cero pa collechar un trunfu perimportante ente la UD Las Palmas. Con esta victoria, el combináu carbayón asitióse en decimoquinta posición con 43 puntos, ocho percima del descensu.