El Real Uviéu quería ganar nel Tartiere, pero nun foi quién. La primer victoria de la temporada como locales resístese al equipu de Juan Antonio Anquela, que repitió l’once idénticu qu’acollechaba la victoria en Lugo la fin de selmana pasada.
Empezó muncho más fuerte l’Elche, metíu nel partíu y apertando dende’l primer minutu, y el gol llegó cuando trescurrieren malpenes cinco minutos de partíu. Manuel Sánchez anotaba rematando un saque d’esquina que ponía per delantre al equipu de Pacheta, recibíu con un ciñu tremendu, nel Carlos Tartiere. Reaccionaba entós el Real Uviéu y metía una marcha más hasta llograr el gol. Joselu empataba aprovechando un fallu de José Juan, y firmando l’un a un, volviendo meter al conxuntu uviedista nel partíu. Saúl Berjón túvola primero del descansu, con más averamientos del Real Uviéu, estrellando un disparu bien potente na escuadra.
Na segunda col pasu de los minutos l’Elche fíxose col control del partíu. Boateng probó con un disparu dende la frontal qu’atrapó’l meta ilicitanu al empiezu del segundu tiempu y, a pesar de los cambeos pa enfrescar l’ataque, al Real Uviéu costába-y combinar y crear peligru, énte un Elche que buscaba les contres pa tratar de facer dañu al conxuntu uviedista. Defendióse l’equipu d’Anquela y trató d’aprovechar les que tuvo ensin aciertu, firmando a la fin un empate a un gol nel Carlos Tartiere.
L’equipu vuelve a los entrenamientos mañana a les 10:30 hores n’El Requexón.
