La sala de prensa del Carlos Tartiere acoyó esta tarde la presentación oficial de Sergio Tejera como xugador nuevu del Real Uviéu.
El director de Rellaciones Institucionales de la entidá, César Martín, dio-y la bienvenida al proyectu del Real Uviéu, destacando que “Sergio ye un xugador que va ser importante na plantiya. Ye un centrocampista creativu, con llegada, que nos va ayudar muncho nesti cursu que vien. Tejera ye un xugador mui cobiciáu na categoría, apostemos por él, porque nos paez que va marcar diferencies. Tamos de norabona por tenelu aquí”.
El catalán empezó cuntando cómo foi'l fichaxe pol conxuntu azul, señalando que “la historia col Real Uviéu vien de llargo. L'añu pasáu falemos, pero por circunstancies nun pudi salir. Esti añu l'interés del Real Uviéu foi mui grande. Tardemos, porque quería salir de Tarragona lo meyor posible, pero al final yá toi equí”.
Sobre les referencies que tien sobre'l conxuntu azul, Tejera asegura que “falé con Rocha, Mossa y Forlín y falen maraviyes. Ye un club que lleva años faciendo les coses bien, ye una oportunidá perguapa. Ye un equipu ambiciosu, que merez tar lo más arriba. Vengo a trabayar y a facer coses guapes con ellos. Toi con gana d'ayudar, de dar el mio meyor fútbol y volve-yos l'enfotu”. Amás, en cuantes a si pudo falar con Juan Antonio Anquela, el mediocentru afirma que “nun tuvi ocasión de falar con él. Voi velu estos díes y yá falaremos a lo llargo de la pretemporada de too.
Entrugáu sobre la demarcación del campu que quier más ocupar, el catalán asegura que “toi disponible pal míster, quiero ayudar al equipu. Nun tengo nengún problema a la hora de ocupar un sitiu nel campu, onde l'entrenador decida”.
En cuantes a la so estrena nel Tartiere, na eliminatoria d'ascensu a Segunda B contra'l Mallorca, el mediocentru recuerda que “foi un partíu mui guapu. El campu taba a arreventar y pa nós foi espectacular”.
P'acabar, sobre l'oxetivu que se marca col Real Uviéu na temporada qu'empieza, Sergio Tejera entiende que “too ta en trabayar. Hai bon grupu y, si toos trabayamos bien y ponemos, pueden facer grandes coses”, sentenció'l catalán.
AST
