La Unión Deportiva Las Palmas foi'l rival del Real Oviedo nuna nueva xornada de competición nel NMR Carlos Tartiere, la 34º nel calendariu para los azules, qu'acabó con tables nel marcador, y con un conxuntu de la capital del Principáu que nun cesó na so llucha por consiguir el gol mientres los 90 minutos.
Repitiendo'l mesmu once de la pasada xornada en Castellón, con Femenías; Juanjo Nieto, Arribas, Bolaño, Mossa; Sangalli, Edgar, Tejera, Borja Sánchez; Nahuel y Blanco Leschuk sobro'l verde del feudu uvieín, encaró'l Real Oviedo el choque ente'l conxuntu insular, que se fixo col control del xuegu na primer metá y foi sometíu polos azules na segunda.
Nos primeres cuarenta y cinco minutos, bien físicos y de muncho contactu, Las Palmas fízose col control del xuegu, con un Real Oviedo que-y costaba llevar a cabo transiciones p'averase a la portería de Vallés. Les defenses xugaron un papel importante nesti primer actu, esbaratando nel peligru xeneráu por dambos equipos nes árees. Tejera tuvo la ocasión más clara, con un disparu dende'l vértiz de la área, pero ´l meta insular repelió el tiru. Cola resultancia de 0-0 llegar al descansu.
Tres el pasu por vestuarios, el partíu tuvo marcáu poles interrupciones y entró nuna fase na que'l Real Oviedo fízose col control del xuegu y empezó a buscar les bandes pa xenerar centros n'área rival. Rodri Ríos foi'l primer cambéu de los azules. Nel 65 Jesé vio la colorada por una entrada sobro Sangalli. Tres la espulsión del xugador canariu los azules empezaron a apoderar, con constantes ataques sobro la meta defendida por Vallés. Ziganda introdució a Borja Valle, qu'empezó a buscar balones ente llínees colos que superar les llínees de Las Palmas. Sangalli, Borja Sánchez, Nahuel y el mesmu Borja Valle xeneraron ocasiones sobro la meta de Las Palmas, pero'l porteru canariu emplegóse a xeitu pa esbaratar les opciones oviedistas. Obeng foi l'últimu cambéu del partíu.
Nuevu puntu nel casillero de los azules, que dende mañana van empezar a preparar el choque de la próxima fin de selmana ente ´l Sporting de Xixón.
