El Real Oviedo visitaba El Alcoraz pa encariar el partíu correspondiente a la xornada 24 de la LaLiga Smartbank énte la S.D. Huesca. Los d'Álvaro Cervera formaben d'entamu con: Braat, Lucas, Rodri Tarín, Dani Calvo, Abel Bretones, Viti, Luismi, Jimmy, Sangalli, Koba y Obeng.
Los azules entraron al alcuentru con bon pié y a puntu tuvieron de ponese per delantre nos primeros minutos. Un bon disparu de Samu Obeng dende la frontera nel 6 ́ fixo que'l porteru visitante tuviera que realizar una gran espurrida pa evitar el primer tantu de los uvieinos. Abel Bretones tamién goció d'una clara ocasión nel primer periodu anque'l so remate salió raspiando'l travesal. Cuando meyor taba'l combináu d'Álvaro Cervera, una gran xugada de Koba terminaba con un claru penalti sobro Viti Rozada, que'l colexáu nun duldó en señalar. El mesmu Koba Leïn asumió la responsabilidá dende los once metros y nun falló énte Andrés Fernández p'anotar el primeru nel 39 ́. Cuando tou indicaba que el carbayones colaben al descansu per delantre, un gran gol de chilena de Pulido, énte'l que Braat nun pudo facer nada, punxo les tables nel marcador nel 41 ́.
Tres la continuación, el conxuntu d'Álvaro Cervera quedó con un xugador menos dempués de la espulsión de Luismi nel 57 ́. Magar ello, l'equipu nun se vieno embaxo y tiró d'arguyu pa encarar la postrera media hora d'alcuentru. Los azules cuayaron una gran segunda parte, sobremanera en defensa, con diez xugadores y a puntu tuvieron de llevase los trés puntos tres una gran xugada d'Abel Bretones nel descuentu. El llateral, dempués una bona xugada individual, apuró la llínea de fondu de la meta defendida pol Huesca pero'l so pase tras nun atopó rematador.
El conxuntu azul va tornar esti martes a los entrenamientos, empezando a preparar el choque de la próxima fin de selmana énte´l Villarreal B.
