La xornada 6 en LaLiga SmartBank llevó al Real Oviedo a Can Misses para vese les cares cola UD Ibiza, nun choque que se saldó con empate, col equipu oviedista que supo sobreponese al tantu anotáu polos baleares.
Con Femenías; Lucas, David Costas, Dani Calvo, Pierre Cornoud; Viti, Luismi, Jimmy, Borja Sánchez; Borja Bastón y Samuel Obeng, apostando por dar -y continuidá a les bones resultancies de les dos últimes xornaes, saltaron los del Cuco Ziganda sobre'l campu balear, volviendo demostrar les sos intenciones de sacar un desenllaz positivu de la so visita al conxuntu ibicenco.
Los de la capital del Principáu tuvieron un arranque de partíu bien seriu, sabedores del guión qu'había que llevar a cabu pa face-y dañu a un rival difícil como ye la UD Ibiza. Cola posesión del balón, ensin perdes y sabiendo tener la pelota pa facer bon fútbol empezaron a llegar les ocasiones pa los del Cuco Ziganda, con Borja Bastón, Samuel Obeng y la velocidá de Viti como principales actores para llogralo. En defensa, el Real Oviedo emplegóse a xeitu, con una presión alta qu'empezó nos
delanteros y terminó pola pareya de centrales. Joan Femenías evitó'l primer tantu del Ibiza a la media hora de xuegu, con una gran parada a remate de cabeza dende'l centru del penalti. Magar la superioridá oviedista, el conxuntu insular adelantróse nel marcador con un remate de Javi Lara. Tres el gol ambos equipos partieron la pelota, ensin ocasiones clares para nengunu de los dos.
Na segunda metá los papeles invirtiéronse, con un Ibiza qu'entró meyor al partíu, y un Real Uviéu al que-y costaba combinar pa volver facese col xuegu. Ziganda movió'l banquín, con un doble cambéu, dando entrada a Brugman y Jirka, primero que Femenías evitara'l segundu tanto para l´Ibiza, con una gran parada. Javi Mier, Montiel y Matheus Aiás, en triple sustitución, fueron los siguientes n'entrar al terrén de xuegu. Precisamente, de les botes de Joni Montiel, a balón paráu nuna falta dende la esquierda, nació l'empate del Real Oviedo, cuando Brugman adelantróse a la defensa balear para rematar a placer sobre la portería local. El tantu volvió meter nel partíu a los de la capital del Principáu, que xeneraron tol peligru nos minutos finales del choque. Montiel, Javi Mier y Borja Bastón tuvieron tres acciones para da-y la vuelta al marcador, anque nun llograron materializales. Tres siete minutos d'agregu, el colexáu pitó la conclusión del choque.
Tables en Can Misses, d'onde'l Real Oviedo saca un puntu importante ente'l conxuntu insular, que-y dexa atropar una selmana más sumando para asitiase con nueve puntos na tabla. Los azules van recibir la próxima fin de selmana al Girona, el domingu dende les 18:15 hores nel Carlos Tartiere.
