Anduva foi l'escenariu de la 18ª xornada en LaLiga Smartbank, na que'l Real
Oviedo visitó al CD Mirandés, con repartida de puntos al términu de los
noventa minutos de xuegu.
Con un once formáu por Femenías; Carlos Isaac, David Costas, Dani Calvo,
Mossa; Sangalli, Jimmy, Brugman, Viti; Pombo y Borja Bastón saltó'l
conxuntu de la capital del Principáu sobro'l verde del estadiu burgalés,
nun partíu bien apostáu, nel que dambos equipos tomaron la midida y
midiéronse de tu a tu.
La primer metá foi un periodo nel que dambos equipos estudiáronse, tratando
de buscar el lladral pol que faer dañu al so rival. El Real Oviedo tuvo nes
botes de Marco Sangalli, tres una bona combinación de los homes de
creación, la más clara del primer actu. El Mirandés nun tuvo apenes
ocasiones de peligru sobro la meta de Femenías, con un conxuntu oviedista
bien seriu en defensa.
Tres el pasu por vestuarios, el partíu siguió col gol del CD Mirandés, que
fixo que los azules empeñárense en buscar l'empate nel marcador. El Cuco
Ziganda introdució cambeos nel equipu, con un triple cambéu. Lusmi, Borja
Sánchez y Matheus Aiás entraron al terrén de xuegu. Precisamente sería'l
brasileñu'l que punxera'l empate nel marcador, anotando un gran tantu pa
los de la capital del Principáu. Joni Montiel foi'l siguiente en facer
entrada sobro'l terrén de xuegu de Anduva. El Real Oviedo tenía la posesión
y el control de xuegu, pero ensin materializar les ocasiones que disponía.
L'alcuentru acabó ensin cambeos nel lluminosu, anque los de la capital del
Principáu intentáronlo hasta'l final.
Repartida de puntos en Anduva, onde'l Real Oviedo vuelve sumar nel
casillero, con un puntu que-yos dexa retayar distancia colos puestos de
privilexu de la clasificación.
