La tarde púnxose-y llueu cuesta arriba al Real Uviéu, pero depués d’aneciar muncho, foi quién a despidise con final feliz. Con cambéu de sistema y la vuelta de los carrileros cola entrada de Javi Hernández en defensa, Anquela apostaba por repetir el guión de la última victoria nel Carlos Tartiere. Pero diba atopase aína col marcador cuesta arriba. A los dos minutos de partíu y na primer xugada a balón paráu llanzada por Osasuna, Unai García anotaba’l cero a un poniendo’l partíu de cara pa los de Jagoba Arraste. Costó-y reaccionar al Real Uviéu, que cuasimente nun creó peligru en tola primer metá, pero tampoco nun concedió en defensa.
Na seguna parte’l conxuntu uviedista medró de la que pasaben los minutos. Javi Hernández probó suerte con un disparu potente que marchó esviáu por poco. Anquela movió bancu primero de lo avezao pa da-y entrada a Ibra, y el partíu camudó. Cambéu de pieces y cambéu de sistema, pa empezar a crear superioridá y llegaes n’ataque de contino. Depués d’aportunar muncho, un balón tornáu pol Osasuna acabó en gol, l’empate. Y el Real Uviéu siguió aportunando. Ramón Folch, de cara, remató con un disparu potente que Rubén unvió a córner. Lillo foi espulsáu pola segunda mariella, y un remate d’Ibra marchó raspiando’l poste. Entró Aarón, y tamién tuvo la so. Aparó’l meta d’Osasuna y unvió a córner. Y finalmente llegaba’l gol. De botes de Saúl Berjón, nuna falta llanzada directo a puerta, y depués de tocar un poco’l meta coloráu, entraba’l segundu gol del partíu y el de la victoria pal conxuntu uviedista, provocando la llocura del Carlos Tartiere.
Trés puntos importantes, pa siguir trabayando a partir del martes, dende les 18:00 hores n’El Requexón.
