Volvía'l Real Oviedo al Carlos Tartiere y fízolo pa recibir a Las Palmas, nun partíu nel que los azules fueron de menos a más, y del que se lleven un puntu qu'a mercé de lo que se vio mientres los noventa minutos dexa un sabor agriduz a los de la capital del Principáu.
El partíu ente selmana, con apenes dos díes pa preparar la cita ente Las Palmas, llevó a Ziganda a faer cambeos nel once, dando entrada a Mossa, Viti, Borja Sánchez y Borja Bastón, que saltaron, xuntu a Femenías, Lucas, Dani Calvo, David Costas, Brugman, Jimmy y Obeng, sobro'l verde del Carlos Tartiere para vese les cares con unu de los equipos, a priori, llamaos a lluchar pol ascensu.
Na primer parte, na que Las Palmas entró meyor al partíu, el Real Oviedo foi de menos a más, creciendo conforme trescurríen los minutos y cuntando coles principales acciones de peligru d'esti actu. El conxuntu insular aprovechó'l so xuegu combinativo pa faese col balón, con un Real Oviedo ordenáu tras que buscaba salir per banda. Nuna d'estes acciones, Viti, con una bona internada dende l'altor de los banquinos, foi zancadilleado na área y el colexáu señaló pena máxima. Borja Bastón anotó dende los once metros pa poner al Real Oviedo per delantre nel marcador. El tantu dio-y al partíu la pausa ansiada polos de la capital del Principáu, qu'empezaron aquitar el balón a los visitantes. Los azules cuayaron unos bonos minutos, disponiendo de delles ocasiones clares p'aumentar la renta nel marcador. Borja Sánchez, en dos ocasiones, y Brugman tuvieron nes sos botes el segundu, pero l'aciertu nun cayó del so llau. Cola resultancia de 1-0llegaóse al descansu nel estadiu oviedista.
Tres el pasu por vestuarios el Real Oviedo salió con chispa, teniendo nel primer minutu una bona acción que Obeng, a la media vuelta, casi llogra rematar. De chilena, a los diez minutos del segundu actu, sería Borja Bastón quien lo intentaría, con un balón qu'impactó nel palu esquierdu de la portería de Raúl Fernández. Ziganda movió'l banquín, buscando enfrescar l'equipu, y dio entrada a Pombo y Sangalli. Sería'l maño el que con un balón al buecu asistiría a Obeng por que lo intentara con remate picáu que detuvo la meta mariellu. El Real Oviedo siguía bien plantao sobro'l terrén de xuegu, bien seriu en defensa y cola pelota na so poder buscando abrir buecos na zaga visitante pa xenerar ocasiones de peligru. Las Palmas tomó aire y dio un pasu adelantre, col que llegó l'empate. Los de Pepe Mel aprovecharon un erru na salida de balón de los de Ziganda, completaron una bona combinación pa llegar a la área oviedista y, con un centru al segundu palu, punxeron el 1-1 nel marcador. Matheus foi'l siguiente n'entrar al campu. Finalmente, el técnicu oviedista llevó a cabu un doble cambeu, dandoentrada a Pierre y Joni Montiel. El partíu acabó abiertu, con ocasiones pa cada equipu, y con una cayida na área de Pombo, que foi baltáu por un xugador visitante, pero que'l colexáu entendió que nun esistía penalti.
Nuevu puntu nel casillero pa los azules, que yá suman la ventena, y que la próxima xornada van visitar al CD Leganés. La primer plantiya va empezar a preparar el choque ente los madrilanos el próximu martes, en sesión vespertina.
