El Real Uviéu llevó un puntu del Ramón de Carranza como premiu al esfuerciu y la fe, porque’l conxuntu uviedista, que foi a remolque en marcador dende’l penalti en contra, nunca dexó de creyer en que, polo menos, l’empate yera posible.
Anquela repitió once pela tercer xornada siguida, y la calor volvió ser protagonista. Percima de los 30 ºC al empezar el partíu, el conxuntu uviedista fixo una bona primer metá anque ensin demasiaos averamientos a la meta de Cifuentes. Dalguna llegada per banda que nun atopó rematador, primero de la bona intervención d’Alfonso Hererro pa tornar a córner un disparu potente del Cádiz. Carlos Hernández remató esviao nuna de les más clares de los d’Anquela, cabeciando percima del llargueru un llanzamientu de falta de Saúl. Toché nun foi quién a safase de la marca de los centrales cadistes, y un bon pase de Mossa en carrera pal capitán uviedista acababa en botes locales depués d’un recatie y autopase que nun acabó de sali-y al delanteru na frontal del área rival.
Yá na segunda metá Anquela dio-y aire al equipu col cambéu de Joselu en cuenta de Toché, mayáu pola calor, en punta. Tamién Aarón sustituyó a Bárcenas na banda, y Joselu tuvo la primera nun pase picáu de Tejera, que remató de primeres a les manes de Cifuentes. Carlos Hernández cometió un penalti que tresformó Alex Fernández cuando restaba un cuartu d’hora pal final del partíu. Y, nel añedíu, Mossa punxo un balón al área que refugó la defensa y Tejera empaló cola esquierda pa convertir n’empate definitivu
L’equipu vuelve pa Uviéu n’autobús y el próximu entrenamientu va ser el llunes a les 18:30 h n’El Requexón.
