Real Uviéu: Alfonso, Carlos Martínez, Carlos Hernández, Josín, Mossa; Edu Cortina, Boateng, Javi Muñoz; Saúl, Aarón y Steven. Na segunda parte; Champagne, Johanneson, Forlín, Christian Fernández, Lobato, Ramón Folch, Borja Sánchez, Ernesto, Tejera, Asier y Toché.
Vetusta: Gorka, Jorge Mier, Emilio, Javier Hernández, Fran, Lolo, Guille Pinín, Marcelo, Conceiçao, Sandoval y Casi. Na segunda parte: Santi, Jerónimo, Alex, Ugarte, Lucas, Javi, Carlos, Mauro, Isma, Arturo, Marcos. Tamién xugaron Lucas (ps) y Eloy.
Goles: 1-0. Carlos Hernández (min 4).
El primer amistosu de la pretemporada ente’l primer equipu de Real Uviéu y Vetusta rexistró llenu absolutu nunes instalaciones d’El Requexón que tuvieron que restrinxir l’accesu de públicu minutos primero d’entamar el partíu por aforu completu.
Con un once titular nel equipu d’Anquela reforzáu con dellos de los xugadores del filial que completen la pretemporada col primer equipu, el partíu empezó con un par d’averamientos del Real Uviéu al área del Vetusta. Nel minutu cuatro un córner llanzáu por Saúl Berjón acababa en gol de Carlos Hernández, al remate del saque d’esquina, poniendo per delantre al equipu de Anquela. La siguiente ocasión clara túvola Steven, pero llegó forzáu al remate d’un pase rasu de Mossa al centru del área, qu’atrapó Gorka. Carlos Martínez completaba 25 minutos, y Lucas entraba a sustituyilu nel llateral derechu. Guille Pinín remató dende la frontal, esviao, nun saque d’esquina pal Vetusta botáu por Javi Hernández. L’equipu de Rozada tuvo tamién una bona combinación al borde del área ente Marcelo y Guille Pinín, qu’acabó nun pase fondu pa Casi. Remató al llateral de la rede. La primer metá terminó con una falta llanzada por Javi Hernández, qu’atrapó Alfonso.
Na segunda, y con dos onces nuevos en dambos conxuntos, hubo menos ocasiones endambos equipos. Tejera, con un llanzamientu de falta na frontal, atopóse col meta del Vetusta. Borja Sánchez, con un disparu dende’l borde del área, probó suerte nos últimos minutos, pero’l porteru Lucas salvó’l córner pal Vetusta. Un tiru rasu d’Ernesto, que volvió atrapar el meta del filial azul, foi la última ocasión pa los d’Anquela.
Asina acabó’l primer ensayu de la pretemporada pa dambos conxuntos, que nos díes vinientes van tener más partíos de preparación.
AST
