Imparables. El Real Oviedo supera al CD Leganés, el líder de la categoría, nun alcuentru nel que los azules fueron meyores y merecieron los trés puntos. Un golazu de Paulino, nel minutu 89, desamarró la llocura nel Carlos Tartiere que festexó un nuevu trunfu carbayón énte unu de los rivales más complicaos de la categoría.
Pa esti alcuentru, el técnicu catalán, Luis Carrión, allinió un once formáu por: Leo Roman, Viti, Luengo, Dani Calvo, Abel Bretones, Jimmy, Colombatto, Dubasin, Sebas Moyano, Masca y Borja Bastón. Los uvieinos entraron meyor al partíu anque nun foi hasta'l minutu 35 cuando llegó la primer ocasión clara del alcuentru. Un centru de Viti Rozada foi rematáu de cabeza por Sebas Moyano pero'l porteru rival evitó'l gol con un paradón.
Bastón, yá na segunda parte, tamién tuvo a puntu d'abrir el marcador pero otra gran intervención de Conde facía qu'el 0-0 siguiera imperando nel lluminosu. El conxuntu uvieín taba con una marcha más nel partíu y nun cesó en buscar la victoria hasta'l final. Colombatto de falta en primer llugar y Dubasin darréu tamién lo intentaron anque tuvo que ser Paulino el que, con un golazu, punxera pates arriba el Carlos Tartiere.
Golazu espectacular del "18" pa desamarrar la llocura nel municipal uvieín y pa siguir a l'alza. Con esta victoria, el combináu carbayón sigue intratable y sigue esguilando puestos na tabla. Los azules, que van volver al trabayu'l próximu martes, van midise al Eldense la próxima xornada nuevamente en casa énte la so afición.
