Anquela repitó once nel Nou Estadi, y el Real Uviéu despachó un gran principiu de partíu con hasta trés ocasiones clares que nun atinó a convertir en gol. Un bon guión pa empezar l’alcuentru, que Joselu protagonizó con una gran ocasión de chilena n’área, que marchaba raspiando’l llargueru. De siguío yera Tejera quien probaba con un disparu potente dende la frontal qu’atrapó Becerra, y de nuevo Joselu llegaba mui forciáu al remate d’un centru de Saúl Berjón dende la esquierda. Cuando meyor taba’l Real Uviéu llegó’l gol del Nástic, nuna xugada de mala fortuna pa los uviedistes y aciertu de Suárez, poniendo l’un a cero en marcador. Yera la primer llegada clara del Nástic, y a partir d’entós al conxuntu uviedista costó-y más llegar con solvencia al área rival. Alfonso intervieno pa sacar un balón que buscaba la escuadra, y llegóse al descansu.
Na segunda metá Anquela realizó un cambéu doble cuando trescurrieren diez minutos de xuegu. Johannesson y Mossa retirábense y entraben nel so sitiu Javi Muñoz y Ibra. Cambéu d’esquema y refuerzu n’ataque con dos puntes pa buscar l’empate. Y llegó, de botes d’Ibra en xugada a balón paráu que punxo Saúl, dende’l llateral esquierdu del área, y que Forlín remataba al palu pa emburriala Ibra cuasi enriba de la raya. El Real Uviéu buscaba la remontada, pero nun llegó l’aciertu. Joselu remató de cabeza y atrapó Becerra, y depués hubo un penalti claru que’l colexáu nun vio. De siguío, nun saltu de Christian y Ramón Folch con un xugador local, el catalán vió la segunda mariella. Quedaben diez minutos, y el Real Uviéu quedaba con diez. Entá asina, siguió apertando, y llegando n’ataque, pero na última xugada del partíu, nun llanzamientu de falta, Albentosa anotaba’l dos a un definitivu. Yera’l minutu 94 y ehí acabó’l partíu.
El Real Uviéu vuelve a Asturies n’autobús y el próximu entrenamientu va ser mañana, llunes, dende les 10:30 hores n’El Requexón.
