La quinta xornada de competición en LaLiga SmartBank dexó nel Carlos Tartiere un Real Oviedo- Cartagena FC nel mediudía del domingu, que se saldó con victoria oviedista por 2-0.
Cola ausencia de Marco Sangalli, que se cayó de la convocatoria por molesties musculares, Ziganda optó por da -y continuidá al once que consiguió la victoria la pasada fin de selmana n´Huesca, cola entrada de Borja Sánchez en llugar del donostiarra, nun partíu nel que los azules entraron meyor qu'el so rival, disponiendo de les ocasiones más clares y llevando el pesu del xuegu.
La primer metá tuvo marcada pol aceleríu inicial de los de la capital del Principáu, colos homes d'ataque bien activos para xenerar ocasiones sobro la portería del Cartagena. Viti, a los cinco minutos de xuegu, tuvo n'un refugue la ocasión más clara del primer actu, pero'l balón colóse-y percima del arcu. Borja Sánchez, con un potente disparu dende la frontera, y Samuel Obeng tuvieron les suyes p'abrir el marcador. Con un Real Oviedo bien asociativu y aplicáu en defensa foi trescurriendo la primer metá, na que, tres la posa d'hidratación, el Cartagena buscó roba-y el balón a los de Ziganda, pero ensin ocasiones manifiestes de gol sobro la portería de Femenías. Nel agregu, y tres revisión del VAR, l'árbitru señaló penalti na área visitante, tres una mano del defensor cartaxinés. Borja Bastón nun falló dende los once metros y punxo per delantre a los azules. Cola resultancia de 1-0 llegóse al descansu.
La segunda metá solo tuvo un color, y foi l'azul, con un Real Oviedo que salió a aumentar la renta nel marcador. Consiguióse gracies a una bona acción de David Costas , que, en centrando, un defensa visitante introdució na portería. Nun cesaron los azules nel so intentu de buscar el terceru, con Viti, los Borjas y Obeng como referentes ofensivos. Movió'l baquillo Ziganda dando entrada a Brugman, primero, Javi Mier, de segundes, y Joni Montiel como últimu cambéu. Los azules nun dexaron terrén a los cartaxineses, con un gran partíu en defensa de tol equipu.
Tres nuevos puntos, segunda victoria consecutiva pa los de la capital del Principáu, que dende mañana van empezar a preparar el partíu de la próxima fin de selmana ente El Ibiza.
