Isidro Lángara, doctoráu en fútbol y sobresaliente cum laude nel arte de facer goles, entra agora na Universidá d'Uviéu al traviés d'una gran esposición antolóxica que acerca al gran públicu la figura del futbolista del Real Oviedo.
La muestra, organizada pola Fundación Real Oviedo y la Fundación Iberoamericana Asicom, va tar abierta dende'l 23 de marzu hasta'l 1 d'abril nel claustru altu del Edificiu Históricu de la Universidá d'Uviéu.
Baxo'l títulu Lángara, el Señor de los goles, la esposición muestra una coleición única d'oxetos relativos a la biografía del meyor goleador español de tolos tiempos. Amás de material propiedá del Real Oviedo y d'alguna coleición privada, espónse na muestra gran cantidá de semeyes, publicaciones, medalles y oxetos personales que primero el mesmu Lángara y dempués la so familia conservaron a lo llargo de décades y que agora'l gran públicu tien la oportunidá de disfrutar.
La Fundación Real Oviedo y la Fundación Iberoamericana de Comunicación, cola inestimable collaboración de la Universidá d'Uviéu, BSB Espresión Gráfica y la xenerosa y fundamental ayuda de la familia Lángara, siéntense orgulloses de que esta esposición seya una realidá que rinde homenaxe a un gran deportista que siempre fizo gala de grandes valores humanos a pesar de la dura vida que-y deparó'l destín.
Isidro Lángara ta consideráu el meyor goleador español de tolos tiempos pola Federación Internacional d'Hestoria y Estadística de Fútbol. Seya ye entá güei la meyor media de goles por partíu na Primer División d'España y el meyor promedio goleador cola selección española. Ye l'únicu futbolista na hestoria de la Lliga que llogró hat-tricks en tres partíos consecutivos de la máxima división del fútbol español. Y naide precisó tan pocos alcuentros como él pa algamar el centenar de goles na Primer División d'España.